Andhra Pradesh Amaravati Three Years.. ఆంధ్ర ప్రదేశ్ రాజధాని అమరావతి నిర్మాణ పనులు ఎక్కడిదాకా వచ్చాయి.?
ఉమ్మడి తెలుగు రాష్ట్రం విభజనతో, ఆంధ్ర ప్రదేశ్ రాష్ట్రానికి రాజధాని అవసరమైంది. పదేళ్ళపాటు హైద్రాబాద్‌ని ఉమ్మడి రాజధానిగా విభజన చట్టంలో పేర్కొనగా, ఆ పదేళ్ళ ఇప్పటికే పూర్తియిపోయాయి.
పదేళ్ళ తర్వాత కొత్తగా రాజధాని కోసం వెతుక్కోవడం కష్టమన్న కోణంలో, ముందుగానే రాజధాని అమరావతికి శంకుస్థాపన చేసింది అప్పట్లో చంద్రబాబు ప్రభుత్వం.
వైసీపీ అధికారంలోకి వచ్చాక, రాజధాని అమరావతిని స్మశానంగా, ముంపు ప్రాంతంగా, ఎడారిగా.. అభివర్ణిస్తూ, రాజకీయ కోణంలో ‘కమ్మరావతి’ అని పేర్కొంది.
ఈ క్రమంలో అమరావతి నిర్మాణ పనుల్ని వైసీపీ హయాంలో పూర్తిగా నిలిపేశారు. అలా, రాజధాని అమరావతి.. ఐదేళ్ళపాటు ఎదుగూ బొదుగూ లేకుండా పోయింది.
టీడీపీ – బీజేపీ – జనసేన కూటమి అధికారంలోకి వచ్చాక, రాజధాని అమరావతి పనులు పరుగులు పెడతాయని అంతా అనుకున్నారు.
పనులు పునఃప్రారంభమైనా, ఏ స్థాయిలో ప్రస్తుతం రాజధాని అమరావతి నిర్మాణం జరుగుతోందన్నదానిపై స్పష్టత లేదు.
రాజధాని నిర్మాణ వ్యవహారాల్ని చూసుకుంటోన్న మంత్రి నారాయణ తాజాగా, ‘మూడేళ్ళలో రాజధాని నిర్మాణం పూర్తి’ అంటూ ప్రకటించేసుకున్నారు.
ఇలాంటి ప్రకటనలు నారాయణ చేయడం ఇదే కొత్త కాదు. గతంలో.. అంటే, 2014-19 మధ్యకాలంలో మంత్రిగా వున్నప్పుడూ నారాయణ ఇవే వ్యాఖ్యలు చేశారు.
2018 చివరి నాటికే, రాజధాని అమరావతి తొలి దశ నిర్మాణం పూర్తయిపోతుందని అప్పట్లో నారాయణ ప్రకటించిన సంగతి తెలిసిందే.
ఇప్పుడిది 2025. రాజధాని అమరావతి అంటే, ఆంధ్ర ప్రదేశ్ ప్రజల ఆత్మ గౌరవం. రాజధాని అమరావతితోపాటు రాష్ట్రానికి జీవనాడి అయిన పోలవరం ప్రాజెక్టు పనులు ఎక్కడిదాకా వచ్చాయన్నది ఓ మిస్టరీ.!
ఇప్పుడు కాకపోతే ఇంకెప్పుడు.? అన్న కోణంలో యుద్ధ ప్రాతిపదికన పూర్తవ్వాల్సిన ప్రాజెక్టులు.. రాజధాని అమరావతి, పోలవరం.!
ఇంకో మూడేళ్ళలో.. అంటే, 2028 నాటికి రాజధాని అమరావతి పూర్తవుతుందని మంత్రి నారాయణ మాటల్ని బట్టి అర్థం చేసుకోవచ్చు.
కానీ, ఆయన మాటల్ని ఎంతవరకు నమ్మడం.? అన్నదే మిలియన్ డాలర్ క్వశ్చన్.!
