Nagarjuna Konda Surekha Case Closed.. అక్కినేని నాగార్జున, తెలంగాణ మంత్రి కొండా సురేఖపై ‘పరువు నష్టం’ దావా వేశారు.!
రాజకీయ ప్రత్యర్థి కేటీయార్ మీద విమర్శలు చేసే క్రమంలో, సమంత – నాగచైతన్య విడాకుల వ్యవహారంపై అభ్యంతకర వ్యాఖ్యలు చేశారు కొండా సురేఖ.
సంబంధం లేని వ్యవహారాల్లోకి తన కుటుంబాన్ని లాగడంపై అక్కినేని నాగార్జున తీవ్ర ఆవేదన వ్యక్తం చేశారు. పలువురు సినీ ప్రముఖులు, అక్కినేని కుటుంబానికి అండగా నిలిచారు.
‘న్యాయ పోరాటం చెయ్యాల్సిందే..’ అంటూ అక్కినేని కుటుంబం, న్యాయస్థానం మెట్లెక్కింది. ఈ క్రమంలో, తూతూ మంత్రం క్షమాపణ ఒకటి ఓ సారి చెప్పేశారు కొండా సురేఖ.
Nagarjuna Konda Surekha Case Closed.. గుణపాఠం నేర్పించాల్సిందే..
‘సరిపోదు, గుణపాఠం ఆమెకు నేర్పించాల్సిందే..’ అని అక్కినేని అభిమానులు సోషల్ మీడియా వేదికగా తేల్చి చెప్పారు. విషయం న్యాయస్థానంలోకి వెళ్ళింది.
ఇంతలోనే, కొండా సురేఖ సోషల్ మీడియా వేదికగా ‘చింతిస్తున్నాను’ అంటూ, ఓ ట్వీట్ వేశారు. అక్కినేని నాగార్జున, మెత్తబడ్డారు.! కథ సుఖాంతం.
పరువు నష్టం దావాని నాగార్జున వెనక్కి తీసుకున్నట్లు వార్తలూ వచ్చేశాయి.. దాంతో, అక్కినేని అభిమానులు విస్తుపోయారు.
పరువూ లేదు.. నష్టమూ లేదు.. అంతేనా.? అంటూ, ఈ మొత్తం వ్యవహారంపై ‘ఆశ్చర్యం, ఆవేదన’ వ్యక్తమవుతున్నాయి అక్కినేని అభిమానుల నుంచి సోషల్ మీడియా వేదికగా.
అద్దాల మేడపై విసిరే రాళ్ళు..
సినీ జీవితాలంటేనే, వాటిని అద్దాల మేడతో పోల్చుతారు. ఎవరైనా రాయి విసిరేసి పోవచ్చు. పగిలేది అద్దం గనుక, ఆ అద్దాల మేడలో వున్నవాళ్ళు చూసీ చూడనట్లు వ్యవహరించాలంతే.
అంతేనేమో.! లేకపోతే, అక్కినేని నాగార్జున లాంటి స్టార్ హీరో.. తన కుటుంబంపై ఓ రాజకీయ నాయకురాలు ‘మచ్చ’ వేసే ప్రయత్నం చేస్తే, లైట్ తీసుకోవడమేంటి.?
ఇలాంటి విషయాల్లో న్యాయస్థానాలు మాత్రం ఏం చేయగలవు.? ఇరు వర్గాలూ రాజీ పడితే, న్యాయస్థానమూ సమ్మతించక తప్పని పరిస్థితి.!
ఇక్కడికి ఇలా.! ఇంకో సినీ ప్రముఖుడి కుటుంబంపై ఇంకో రాజకీయ నాయకుడు లేదా నాయకురాలు అభ్యంతరకర వ్యాఖ్యలు చేస్తారు.. మళ్ళీ కథ మామూలే.!
ఈ మొత్తం ఎపిసోడ్‌లో సినీ ప్రముఖులకు పరువు ప్రతిష్టలనేవి వుండకూడదు.. అన్న సందేశాన్ని చూడొచ్చా.? అంతేనేమో.!
సినిమా హీరోలు.. తమ హీరోయిజం తెరపైనే చూపించగలరు.. నిజ జీవితంలో వాళ్ళంతా జీరోలని రాజకీయ నాయకులు అంత నిర్లజ్జగా ఎందుకు మాట్లాడతారంటే.. ఇదిగో, ఇందుకే.!
