Varanasi Title Fighting.. జక్కన్న రాజమౌళి దర్శకత్వంలో మహేష్ హీరోగా తెరకెక్కుతున్న సినిమా టైటిల్ ‘వారణాసి’.!
ఈ టైటిల్‌ని రివీల్ చేయడం కోసం, దాదాపు పాతిక కోట్లు వెచ్చించి ‘గ్లోబ్‌ట్రోటర్’ ఈవెంట్ ఇటీవల నిర్వహించిన సంగతి తెలిసిందే.
సూపర్ స్టార్ మహేష్‌బాబుతోపాటు ఈ సినిమాలో గ్లోబల్ బ్యూటీ ప్రియాంక చోప్రా, మలయాళ నటుడు పృధ్వీరాజ్ సుకుమారన్ ఇతర ప్రధాన పాత్రల్లో నటిస్తున్నారు.
మరోపక్క, ‘వారణాసి’ టైటిల్‌తో ఆల్రెడీ ఇంకో సినిమా గురించిన ప్రకటన కొద్ది రోజుల క్రితమే వచ్చింది. అదీ, రాజమౌళి ‘వారణాసి’ అధికారిక ప్రకటన కంటే ముందే.!
అదే, ఇప్పుడు వివాదానికి కారణమైంది. ‘వారణాసి’ చిత్ర నిర్మాత, ఫిలిం ఛాంబర్‌ని ఆశ్రయించారు. తమ సినిమా ‘వారణాసి’ టైటిల్ హక్కులు తమకే వున్నాయన్నది ఆ చిత్ర నిర్మాత సుబ్బారెడ్డి వాదన.
రామ బ్రహ్మ హనుమ క్రియేషన్స్ పతాకంపై సుబ్బారెడ్డి ‘వారణాసి’ పేరుతో ఓ సినిమాని నిర్మిస్తున్నారు. ఆయనే, రాజమౌళిపై ఫిలిం ఛాంబర్‌ని ఆశ్రయించారు.
గతంలో, త్రివిక్రమ్ శ్రీనివాస్ దర్శకత్వంలో తెరకెక్కిన ‘ఖలేజా’ సినిమాకి కూడా టైటిల్ వివాదం వచ్చింది. అప్పట్లో ‘మహేష్ ఖలేజా’ అంటూ ఆ సినిమా టైటిల్‌ని మార్చుకున్నారు.
చాలా సినిమాలకి టైటిళ్ళ విషయమై వివాదాలు వస్తుంటాయి. ‘కత్తి’ సినిమాకి టైటిల్ గొడవ రావడంతో, ‘కళ్యాణ్ రామ్ కత్తి’ అంటూ విడుదల చేశారు.
మరిప్పుడు, రాజమౌళి ఏం చేయబోతున్నారు.? ‘మహేష్ వారణాసి’గా సినిమా టైటిల్‌ని మార్చుకోవాల్సిందేనా.? లేదంటే, ‘కాాంప్రమైజ్‌కి వచ్చి, టైటిల్‌ని కొంత మొత్తానికి కొనుగోలు చేస్తారా.?’ అన్నది ఆస్తికరంగా మారింది.
‘కాటమరాయుడు’ టైటిల్‌ని వేరొకరి దగ్గర వుంటే, పవన్ కళ్యాణ్ మీద అభిమానంతో ఆ టైటిల్ ఇచ్చేశారు.
‘కాటమరాయుడు’ పేరుతో, సప్తగిరి హీరోగా ఓ సినిమా అనుకున్నారు అప్పట్లో.
పెద్దమనుషులు రంగంలోకి దిగితే, ‘వారణాసి’ టైటిల్ వివాదం టీ కప్పులో తుపానులా క్షణాల్లో చల్లారిపోతుందన్నది నిర్వివాదాంశం.
అన్నట్టు, ‘గ్లోబ్‌ట్రోటర్’ ఈవెంట్‌లో, హనుమాన్ మీద రాజమౌళి చేసిన వివాదాస్పద వ్యాఖ్యల నేపథ్యంలో, రాజమౌళిపై పోలీసులకు పిర్యాదు చేశారు కొందరు. కేసు నమోదైంది.
