Vijaya Sai Reddy Kula Bhojanalu.. మాజీ ఎంపీ, ఒకప్పటి వైసీపీ నేత, చార్టెడ్ అకౌంటెంట్ విజయ సాయి రెడ్డి మళ్ళీ వార్తల్లోకెక్కారు.! వన బోజనాల స్థానంలోకి కుల భోజనాలు పుట్టుకొచ్చిన సంగతి తెలిసిందే.
అలాంటి కుల భోజనాల కార్యక్రమంలో, విజయ సాయి రెడ్డి పాల్గొన్నారు. అది కూడా, నెల్లూరుకి చెందిన విజయ సాయి రెడ్డికి శ్రీకాకుళం జిల్లాలోని కుల భోజనాల కార్యక్రమానికి ఆహ్వానం అందడం గమనార్హం.
‘జై సైరా.. జైజై సైరా..’ అంటూ, విజయ సాయి రెడ్డిని సదరు ‘కుల భోజనాల కమిటీ’ ప్రత్యేకంగా ఆహ్వానించి, జేజేలు పలికింది.
ఈ క్రమంలో, విజయ సాయి రెడ్డి మొహాన మీడియా కెమెరాలు, యూ గొట్టాలూ (యూ ట్యూబ్ చానళ్ళ మైకులు) గట్టిగానే దాడి చేసేశాయి.
Vijaya Sai Reddy Kula Bhojanalu.. రాజకీయాల్లోకి రీ-ఎంట్రీ..
చాలా విషయాలపైన సోకాల్డ్ మీడియా ప్రతినిథులు, విజయ సాయి రెడ్డిని ప్రశ్నించేశారు. వాటికి విజయ సాయి రెడ్డి చిత్ర విచిత్రమైన సమాధానాలూ చెప్పారు.
ఏపీ డిప్యూటీ సీఎం పవన్ కళ్యాణ్ తనకు చిరకాల మిత్రుడంటూ ఆసక్తికరమైన వ్యాఖ్యలు చేశారు విజయ సాయి రెడ్డి. ఏనాడూ, పవన్ కల్యాణ్ మీద తాను మాట తూలలేదనీ సెలవిచ్చారు.
భవిష్యత్తులోనూ పవన్ కళ్యాణ్ మీద తానెలాంటి విమర్శలూ చేయబోనని కూడా విజయ సాయి రెడ్డి చెప్పడం గమనార్హం. కామెడీకే పరాకాష్ట ఇది.
ఎందుకంటే, వైసీపీ హయాంలో ఆ పార్టీలో కీలక నేతగా వున్నారు విజయ సాయి రెడ్డి. వైసీపీ సోషల్ మీడియా కూడా ఆయన కనుసన్నల్లో నడిచింది.
ఆ సోషల్ మీడియా ద్వారా పవన్ కళ్యాణ్ మీద వైసీపీ చేసిన దుష్ప్రచారం.. అందునా, జుగుప్సాకరమైన దుష్ప్రచారం గురించి ఎంత చెప్పుకున్నా తక్కువే.
ఉత్తరాంధ్రలోనే ఎందుకు.?
ఉత్తరాంధ్ర ప్రాంతానికి చాలకాాలం పాటు వైసీపీ ఇన్‌ఛార్జిగా పని చేసిన విజయ సాయి రెడ్డి, అక్కడి నేతలతో పవన్ కళ్యాణ్‌ని బండ బూతులు తిట్టించిన రోజులున్నాయ్.
సోషల్ మీడియా వేదికగా పవన్ కళ్యాణ్ మీద విజయ సాయిరెడ్డి పరుష పదజాలం ఉపయోగించిన సందర్భాలూ లేకపోలేదు. వాటికి సంబంధించిన స్క్రీన్ షాట్స్ ఇప్పుడు మళ్ళీ తెరపైకొస్తున్నాయ్.
ఇక, కొత్త పార్టీ పెట్టాల్సి వచ్చినా వెనుకంజ వేయనని చెబుతున్నారు విజయ సాయి రెడ్డి. జగన్ చుట్టూ వున్న కోటరీ మీదనే తన ఆగ్రహం తప్ప, ‘మా నాయకుడు జగన్ మీద కాదు’ అని ‘సైరా’ చెప్పడం గమనార్హం.
ప్రస్తుతానికైతే రాజకీయాల్లోకి వచ్చే ఆలోచనేమీ చేయట్లేదనీ, అవసరమైతే ఎప్పుడైనా రాజకీయాల్లోకి వస్తాననీ.. పరస్పర విరుద్ధమైన స్టేట్మెంట్లు ఇచ్చేశారు విజయ సాయి రెడ్డి.
రాజకీయాలు వదిలేసి, వ్యవసాయం చేసుకుంటానని ప్రకటించిన విజయ సాయి రెడ్డి వైసీపీకి గుడ్ బై చెప్పడంతోపాటు, రాజ్య సభ సభ్యత్వానికీ కొన్నాళ్ళ క్రితం రాజీనామా చేశారు.
చిత్రంగా మళ్ళీ రాజకీయాలపై మక్కువ పెంచుకుంటున్నారు విజయ సాయి రెడ్డి. కొత్త పార్టీ పెట్టేంత సీన్ లేదు.! వైసీపీని కాదని వేరే పార్టీలోకి వెళ్ళేంత సీన్ కూడా విజయ సాయి రెడ్డికి లేదు.
ఇదంతా, స్వయంగా విజయ సాయి రెడ్డి చేసిన పబ్లిసిటీ స్టంట్ అంతే. మీడియా కెమరాలు, యూ ట్యూబ్ కెమెరాలు.. అంతా పెయిడ్ వ్యవహారమే.!
కుల భోజనాలకు స్పాన్సర్ కూడా విజయ సాయి రెడ్డేనన్న చర్చ జరుగుతోంది. సొంత జిల్లా నెల్లూరులో కాకుండా, ఉత్తరాంధ్రలోని శ్రీకాకుళంలో కుల భోజనాల్ని ఎందుకు విజయ సాయి రెడ్డి ప్లాన్ చేశారో ఏమో.!
