LCA HAL Tejas Crashed.. దుబాయ్ ఎయిర్ షో సందర్భంగా అత్యద్భుత విన్యాసాలతో ఆకట్టుకున్న తేజస్ యుద్ధ విమానం అనూహ్యంగా ప్రమాదానికి గురైంది.
ముందు రోజు తేజస్ విన్యాసాలు చూసి ప్రపంచమే ఆశ్చర్యపోయిందనడం అతిశయోక్తి కాదు. కానీ, ఈ రోజు అనూహ్యంగా తేజస్ యుద్ధ విమానం, గాల్లో విన్యాసాలు చేస్తూ.. ఒక్కసారిగా కిందికి పడిపోయింది.
తేజస్ యుద్ధ విమానమంటే.. భారత వైమానిక దళానికి సంబంధించి ‘ఆత్మ గౌరవం లాంటిది’ అని రక్షణ రంగ నిపుణులు అభిప్రాయపడుతుంటారు.
ఎప్పుడో, 23 ఏళ్ళ క్రితం తొలి తేజస్ యుద్ధ విమానం గాల్లోకి లేచింది. అప్పటి నుంచి ఇప్పటిదాకా.. ఒకే ఒక్క తేజస్ యుద్ధ విమానం ప్రమాదం బారిన పడింది. తాజా ఘటన రెండోది.!
తేజస్ యుద్ధ విమానం ఇప్పటికే, భారత వైమానిక దళంలో సేవలు అందిస్తోంది. స్వదేశీ తయారీ యుద్ధ విమానం కావడంతో, ఎప్పటికప్పుడు సరికొత్త సాంకేతిక సొబగులు అద్దుకుంటోంది.
త్వరలో తేజస్ ఎమ్కె1ఎ యుద్ధ విమానం భారత వైమానిక దళంలో చేరబోతోంది. తేలికపాటి యుద్ధ విమానంగా తేజస్ గురించి చెప్పుకుంటుంటాం.
తేజస్ ఎమ్కె2 యుద్ధ విమాన రూపకల్పన దిశగా ప్రయత్నాలు జరుగుతున్నాయి. మీడియం వెయిట్ ఫైటర్ ఎయిర్ క్రాఫ్ట్ ఇది.!
అంతర్జాతీయంగా తేజస్ యుద్ధ విమానానికి మంచి క్రేజ్ ఇప్పుడిప్పుడే లభిస్తోంది. పలు దేశాలు, తేజస్ యుద్ధ విమానం కొనుగోలుకు ఆసక్తి చూపిస్తున్నాయి.
దుబాయ్ ఎయిర్ షో సందర్భంగా, పలు దేశాలు తేజస్ యుద్ధ విమానాన్ని కొనుగోలు చేసేందుకు, ఈ యుద్ధ విమానాన్ని తయారు చేసిన హెచ్ఎఎల్‌తో సంప్రదింపులు కూడా జరిపాయి.
ఇంతలోనే అనుకోని ప్రమాదం సంభవించింది. దురదృష్టవశాత్తూ, తేజస్ యుద్ధ విమానం కుప్ కూలిన సమయంలో, దాన్ని నడుపుతున్న పైలట్ కూడా ప్రాణాలు కోల్పోయారు.
ప్రమాదానికి గల కారణాలపై ‘కోర్ట్ ఆఫ్ ఎంక్వయిరీ’ జరుగుతుంది. సాంకేతిక లోపం వల్లనా.? ఇతరత్రా కారణాల వల్లనా.? ఎందుకు తేజస్ కూలిపోయిందన్నదానిపై ముందు ముందు అన్ని విషయాలూ వెల్లడవుతాయి.
ఎయిర్ షో సందర్భంగా, యుద్ధ విమానాలు కుప్ప కూలడం ఇదే తొలిసారి కాదు. గతంలో కూడా, పలు అత్యాధునిక యుద్ధ విమానాలు అనూహ్యంగా విన్యాసాలు చేసి, ప్రమాదాల బారిన పడ్డాయి.
