Luxurious Container Homes.. పూరిల్లు తెలుసు.. తాటాకుల ఇళ్ళు కూడా తెలుసు.! పెంకుటిల్లు, రేకుల ఇళ్ళు, మేడలు, డాబాలు.. అపార్టుమెంట్లు, విల్లాలు.. ఇవన్నీ తెలిసినవే.!
కానీ, ఈ కంటెయినర్ ఇళ్ళేంటి.? వీటిల్లో కాంక్రీట్ వినియోగం తక్కువగా.. అంటే, చాలా చాలా తక్కువగా వుంటుంది. ఎక్కువగా మెటల్, వుడ్ మరియు ఫైబర్ ప్లాస్టిక్ వినియోగం వుంటుంది.
గత కొంతకాలంగా, ఈ కంటెయినర్ ఇళ్ళ గురించి ఎక్కువ ప్రచారం జరుగుతోంది. రకరకాల డిజైన్లలో కంటెయినర్ ఇళ్ళు కూడా అందుబాటులోకి వస్తున్నాయి.
లక్షన్నరకే కంటెయినర్ హౌస్.. అంటూ, ప్రకటనల్ని కూడా చూస్తున్నాం. ఇంత తక్కువ ధరలో లభించేవి, నిజానికి చాలా చాలా చిన్న ఇళ్ళు.
Luxurious Container Homes.. కంటెయినర్లు అంటే..
కంటెయినర్లు తెలుసు కదా.! రవానా కోసం వినియోగించేవి. రైలు వ్యాగన్లు.. కార్గో షిప్స్‌లో ఉపయోగించేవి.. ఇవే లారీల మీద కూడా చూస్తుంటాం.
ఈ కంటెయినర్లనే, ఇళ్ళుగా మార్చుతున్నాయి కొన్ని సంస్థలు. ఓ చిన్న ఆఫీస్ రూమ్, అందులోనే అటాచ్డ్ వాష్ రూమ్, ఓ చిన్న కిచెన్.. వుంటాయి వీటిల్లో.
కానీ, ఇక్కడ మనం చెప్పుకుంటున్న కంటెయినర్ ఇళ్ళు వేరు.! ఈ ఇళ్ళు ఇంకాస్త పెద్దవి.! కంటెయినర్లతోనే తయారు చేస్తారు. కాకపోతే, అదనపు సౌకర్యాలుంటాయ్.
సాధారణ ఇళ్ళకు ఏమాత్రం తీసి పోని నాణ్యత, ఈ కంటెయినర్ ఇళ్ళ సొంతం. 25 నుంచి 50 ఏళ్ళ వరకు ఈ కంటెయినర్ ఇళ్ళకు ఇలాంటి ఇబ్బందీ వుండదంటున్నారు కూడా.
ఏడాదికోసారి మెయిన్‌టెనెన్స్.. అంటే, ఇంటికి పెయింటింగ్స్ వేసుకోవడం, చిన్న చిన్న రిపేర్లు చేయిస్తుంటాం కదా.. వాటితో పోల్చితే, కంటెయినర్ ఇళ్ళకు అంతకు మించిన ఖర్చేమీ అవదు.
మెటల్ ఇళ్ళు కదా, విద్యుత్ షాక్ ప్రమాదం వుంటుందా.? అంటే, ఆ భయమే అవసరం లేదు. తుప్పు త్వరగా పట్టడానికి వీల్లేని మెటీరియల్‌తో కంటెయినర్లు తయారవుతాయి.
పైగా, వాటికి రస్ట్ ప్రూఫ్ పెయింట్ కూడా వాడతారు. వీటిల్లో వాడే వుడ్, ప్లాస్టిక్.. ఇవన్నీ నాణ్యమైనవే వినియోగిస్తుంటారు మామూలుగా అయితే.
రెండంతస్థుల కంటెయినర్ హౌస్‌లు కూడా ఈ మధ్య తయారవుతున్నాయి. వీటికి బాల్కనీ, ప్రత్యేక ఆకర్షణగా వుంటోంది.
ఏడున్నర లక్షల నుంచి, మనక్కావాల్సిన సౌకర్యాల్ని బట్టి.. ధరలు పెరుగుతుంటాయ్ ఈ కంటెయినర్ హౌస్‌ల విషయంలో.
అధిక వేడి వుంటుందేమోనన్న ఆందోళన కూడా అవసరం లేదు. సాధారణ కాంక్రీట్ ఇళ్ళలో వుండే వేడి కంటే, తక్కువే వుంటుందట ఈ కంటెయినర్ ఇళ్ళలో.
కంటెయినర్ ఇళ్ళు ఎవరికి ఉపయోగం.?
సాధారణ ఇళ్ళ కోసం కంటెయినర్ ఇళ్ళ కాన్సెప్ట్ పెద్దగా ఎవరూ ఇష్టపడకపోవచ్చు. కానీ, ఫామ్ హౌస్‌ల కోసం అయితే, ఈ కంటెయినర్ ఇళ్ళు భలేగా వుంటాయి.
ఇటీవలి కాంలో ఫామ్ హౌస్ కల్చర్ పెరిగిన దరిమిలా, ఈ కంటెయినర్ ఇళ్ళకు గిరాకీ పెరుగుతోంది. సాధారణ ప్రజలు కూడా, కంటెయినర్ ఇళ్ళ పట్ల క్రమక్రమంగా ఆసక్తి ప్రదర్శిస్తున్నారట.
మెయిన్‌టెనెన్స్ తక్కువ.. వద్దనుకున్నప్పుడు, రీ-సేల్ వాల్యూ కూడా బాగానే వస్తుంది.. ఇవన్నీ కంటెయినర్ ఇళ్ళకున్న పాజిటివిటీస్.!
ఎక్కడి నుంచి ఎక్కడికైనా వీటిని తరలించవచ్చు. విప్పేసి, బిగించేసుకోవడమే.. అన్నట్లుంటుంది.! ఆయా సంస్థలు, వీటి మెయిన్‌టెనెన్స్ విషయంలోనూ, సంపూర్ణ సహాయ సహకారాలు అందిస్తున్నాయి.
మీ ఇంటిని ఓ ఊరి నుంచి మరో ఊరికి తేలిగ్గా తరలించేందుకూ కొన్ని కంటెయినర్ హౌస్‌లు వీలుగా వుంటాయి. ఇది ఇంకాస్త ఆసక్తికరం కదా.!
తక్కువ వైశాల్యం.. కంటెయినర్ ఇళ్ళకు సంబంధించి ప్రధాన సమస్య.! సౌకర్యాల విషయంలో ముందే చెప్పుకున్నాం కదా, అస్సలేమాత్రం తగ్గేదే లే.!
