One And Only Jagan.. వైఎస్ జగన్ మోహన్ రెడ్డి.. తండ్రి వైఎస్ రాజశేఖర్ రెడ్డి నుంచి రాజకీయ వారసత్వాన్ని అందుకున్నారు.!
వైఎస్ రాజశేఖర్ రెడ్డి నామ జపం చేయకుండా, వైఎస్ జగన్ మోహన్ రెడ్డి రాజకీయాలు చేసే పరిస్థితే లేదు. ఇది అందరికీ తెలిసిన విషయమే.
నారా చంద్రబాబునాయుడు కూడా అంతే, స్వర్గీయ ఎన్టీయార్ నామ జపం చేయకుండా చంద్రబాబు రాజకీయాలు చేయలేరు.! రాజకీయాలంటేనే ఇంత.!
తెలుగు దేశం పార్టీ అధినేత నారా చంద్రబాబు నాయుడు వెంట, నందమూరి కుటుంబమంతా వుంది. ఇది అందరికీ తెలిసిన విషయమే.
చంద్రబాబు బావమరిది నందమూరి బాలకృష్ణ, టీడీపీ నుంచే హిందూపురం ఎమ్మెల్యేగా ప్రాతినిథ్యం వహిస్తున్నారు.
టీడీపీ అధినేత నారా చంద్రబాబు నాయుడు తనయుడు నారా లోకేష్, మంగళగిరి నియోజకవర్గం నుంచి ఎమ్మెల్యేగా వున్నారు. ఆయన ప్రస్తుతం మంత్రి కూడా.!
జన సేన అధినేత పవన్ కళ్యాణ్ పరిస్థితి వేరు. చిరంజీవి ఫొటో లేకుండానే, పవన్ కళ్యాణ్ జన సేన పార్టీ ద్వారా రాజకీయాల్లో కొనసాగుతున్నారు.
పవన్ కళ్యాణ్, చిన్న అన్నయ్య నాగబాబు మాత్రం జనసేనలోనే వున్నారు. ప్రస్తుతం నాగబాబు, శాసన మండలికి ప్రాతినిథ్యం వహిస్తున్నారు.
One And Only Jagan.. తల్లినీ, చెల్లినీ.. దూరం చేసుకుని..
ఇంతకీ, వైఎస్ జగన్ తల్లి విజయమ్మ, షర్మిల ఎందుకు వైఎస్సార్ కాంగ్రెస్ పార్టీకి దూరంగా వున్నట్లు.? ఒకప్పుడు షర్మిల, విజయమ్మ.. వైసీపీ తరఫున పని చేశారు కదా.?
స్వయంకృతాపరాథం.. షర్మిలని మెడపట్టి గెంటేశారు వైసీపీ నుంచి వైఎస్ జగన్ మోహన్ రెడ్డి. విజయమ్మకూ అదే ‘సత్కారం’ జరిగింది వైఎస్ జగన్ మోహన్ రెడ్డి ద్వారా.
తెలంగాణలో షర్మిల పార్టీ పెట్టారు, తెలంగాణ రాజకీయాల్లో యాక్టివ్ అవుదామని విజయమ్మ కూడా అనుకున్నారు.. షర్మిల వెంటే వున్నారు.
వైఎస్ షర్మిల ప్రస్తుతం కాంగ్రెస్ నేత. ఏపీ కాంగ్రెస్ చీఫ్ కూడా.! విజయమ్మ మాత్రం, ప్రస్తుతానికి రాజకీయాలకు దూరంగా వున్నారు.
తనయుడు వైఎస్ జగన్ మోహన్ రెడ్డితో మాత్రం విజమమ్మ రాజకీయంగా కలిసే అవకాశం కనిపించడంలేదు.
చేజేతులా తల్లిని, చెల్లిని రాజకీయంగా దూరం చేసుకున్నారు వైఎస్ జగన్. సాక్షి మీడియా వుంది, వేల కోట్ల ఆస్తులున్నాయి.. తండ్రి పొలిటికల్ లెగసీ.. తనదేనన్న బలమైన నమ్మకం జగన్‌కి వుంది.
జగన్ సతీమణి వైఎస్ భారతి ప్రత్యక్ష రాజకీయాల్లో లేరు. కానీ, భర్త జగన్ కోసం గతంలో ఎన్నికల ప్రచారం చేశారు. చంద్రబాబు సతీమణి భువనేశ్వరి కూడా అంతే.!
కేవలం వరుసకి సోదరుడయ్యే అవినాష్ రెడ్డి కోసమే వైఎస్ జగన్, బంధుత్వాల్ని తెంచుకున్నారు. బాబాయ్ వివేకానంద రెడ్డికి అక్రమ సంబంధాల్ని అంటగట్టారు.
వరుసకి సోదరి అయ్యే సునీతతో వైరం పెట్టుకున్నారు. ఈ క్రమంలోనే షర్మిల మరింత దూరమయ్యారు వైఎస్ జగన్ మోహన్ రెడ్డికి.
ఇవేవీ రహస్యాలు కాదు.. అన్నీ, అందరికీ తెలిసినవే.! చెయ్యాల్సిందంతా చేసేసి, ‘జగన్ ఒంటరి’ అంటూ, ఇప్పుడు సింపతీ కార్డుని తెరపైకి తెస్తుండడమే అత్యంత హాస్యాస్పదం.!
బీజేపీతో వైఎస్ జగన్ మోహన్ రెడ్డికి తెరవెనుకాల స్నేహం.. బహిరంగ రహస్యం.! బీజేపీని కాదని, వైఎస్ జగన్ ఎలాంటి రాజకీయ నిర్ణయమూ తీసుకోలేరు.. అధికారంలో వున్నా, లేకపోయినా.!
కానీ, బీజేపీ వైపు నుంచి జగన్‌కి తగిన సహకారం అందుతోందా.? లేదా.? అన్నదానిపై మళ్ళీ భిన్నాభిప్రాయాలున్నాయి.
బీజేపీ కాకపోతే, కాంగ్రెస్ నేతృత్వంలోని కూటమితో జగన్ సన్నిహితంగా వుండాలి కదా.?
ప్చ్.. అదీ కుదరదు.! ఎందుకంటే, కాంగ్రెస్ పార్టీతో పాత గొడవలున్నాయి వైఎస్ జగన్ మోహన్ రెడ్డికి. గులాబీ పార్టీ, తన మీద మానుకోటలో రాళ్ళేయించినా, ఆ పార్టీ మీద వైఎస్ జగన్ మోహన్ రెడ్డికి ఎనలేని మమకారం.
గతంలో వైఎస్ జగన్ మోహన్ రెడ్డికి ఇదే గులాబీ పార్టీ రాజకీయంగా సాయం చేసింది. గులాబీ పార్టీకి జగన్ కూడా కొంత సాయం చేశారు.. ఇది బహిరంగ రహస్యం.
ఇక్కడ, రాజకీయంగా వైఎస్ జగన్ ఒంటరి.. అని అనడం పూర్తిగా నిజం కాదు. జగన్ కోసం గులాబీ పార్టీ వుంది.! ఏం లాభం.? జోగీ జోగీ రాసుకుంటే బూడిద రాలినట్లుంది పరిస్థితి.
