రియల్ ఎస్టేట్ ఢమాల్.! స్టూడెంట్స్ విదేశీ విద్యా వెతల్.!

Real Estate Overseas Students.. విద్యాభ్యాసం కోసం అమెరికా సహా, ఇతర దేశాలకు వెళ్లేందుకు ప్రయత్నించడం ఇటీవలి కాలంలో సర్వసాధారణమైపోయింది.!

విదేశీ విద్యకి వున్న క్రేజ్ అలాంటిది.! కానీ, విదేశీ విద్య అంటే, అత్యంత ఖరీదైన వ్యవహారం. రోజు రోజుకీ, ఇది మరింత ఖరీదైన వ్యవహారంగా మారిపోతున్న పరిస్థితిని చూస్తున్నాం.

అయినాసరే, ‘తగ్గేదే లే’ అంటోంది నేటి యువత.! విద్యార్థుల తల్లిదండ్రులూ, తమ పిల్లల్ని విదేశాల్లో చదివించడానికే మొగ్గు చూపుతున్నారు.

ఈ క్రమంలో, వున్నదంతా ఖర్చు చేయడానికి సైతం విద్యార్థుల తల్లిదండ్రులు వెనుకాడని పరిస్థితి. ఆస్తుల్ని తాకట్టు పెట్టెయ్యడమో, అమ్మెయ్యడమో తప్పడం లేదు చాలామంది విద్యార్థుల తల్లిదండ్రులకి.

అసలు, విద్యార్థుల విదేశీ చదువులకీ.. రియల్ ఎస్టేట్‌ వ్యాపారానికీ ఏంటి లింకు.? చాలా కారణాలతోపాటు, ఇది కూడా రియల్ ఢమాల్‌కి ఓ కారణమా.?

Real Estate Overseas Students.. భూములు.. లీగల్ చిక్కులే.. అసలు సమస్య..

రియల్ ఎస్టేట్ రంగంలో ‘భూమ్’ రావాలంటే, భూముల లభ్యత పెరగాలి. కానీ, చాలా భూములేమో విద్యార్థుల విదేశీ విద్య నేపథ్యంలో బ్యాంకుల్లో తాకట్టు పెట్టబడి వుంటున్నాయట.

ఇటీవలి కాలంలో, రియల్ ఎస్టేట్ రంగంలో ప్రధానంగా జరుగుతున్న చర్చ ఇది. భూముల్ని అమ్మాలంటే, బ్యాంకుల నుంచి క్లియరెన్స్ రావడం లేదట.

దాంతో, ఇటు భూములు కలిగి వున్నవారికీ డబ్బులు రావడంలేదు.. అటు రియల్ ఎస్టేట్ వ్యాపారులకీ భూముల లభ్యత వుండటం లేదన్నది సర్వత్రా వినిపిస్తోన్న వాదన.

అన్ని సందర్భాల్లోనూ కాకపోయినా, చాలా సందర్భాల్లో ఇలాంటి సమస్యల్ని చూస్తున్నామని కొందరు రియల్ ఎస్టేట్ వ్యాపారులు చెబుతున్నారు.

వేలల్లో కాదు, లక్షల్లో విద్యార్థులు విదేశాలకు వెళుతున్న పరిస్థితిని చూస్తున్నాం. ఎలాగోలా విదేశాల్లో చదువులు పూర్తి చేసి, అక్కడే సెటిలైపోయి.. ఇండియాలో వున్న తమ భూముల్ని కాపాడుకోవాలని చూస్తున్నారు.

అయితే, విదేశాల్లో తమకు ఉపాధి అవకాశాలు తగ్గుతుండడం, ఇతరత్రా ఆర్థిక ఇబ్బందుల నేపథ్యంలో, బ్యాంకుల నుంచి భూముల్ని విడిపించడానికి వీలు కుదరడంలేదట ఎన్నో ఆశలతో విదేశాలకు వెళ్ళినవారికి.

గతంలో ఈ పరిస్థితి ఒకింత భిన్నంగా వుందనీ, క్రమంగా పరిస్థితి దారుణంగా తయారవుతోందనీ ప్రముఖ రియల్ ఎస్టేట్ వ్యాపారులు ఆఫ్ ది రికార్డుగా చెబుతున్నారు.

రియల్ రంగంలో భూమ్ తగ్గిందా.?

రియల్ ఎస్టేట్ రంగం మూడు పువ్వులు ఆరు కాయలుగానే ఎప్పుడూ వర్ధిల్లుతుందనే వాదన వుంది. అయితే, భూముల లభ్యత తగ్గే కొద్దీ, ఈ రంగంలో నిస్తేజం పెరుగుతుందన్నది నిర్వివాదాంశం.

అదే సమయంలో, ప్రాపర్టీస్ కొనుగోలు శక్తి వినియోగదారుల్లో తగ్గితే, తాత్కాలికంగా కొంద నిస్తేజం వుంటుందనీ, మళ్ళీ పుంజుకుంటుందనే ఆశాభావం రియల్ ఎస్టేట్ రంగంలో వుంది.

రాజకీయ కారణాలు, ఇతరత్రా వ్యవహారాలు సైతం రియల్ ఎస్టేట్ రంగంలో వెలుగులకీ, చీకట్లకీ కారణమనే అభిప్రాయాలూ లేకపోలేదు.

అధికారంలో వున్నవారు, రియల్ ఎస్టేట్ రంగానికి ఇచ్చే ప్రోత్సాహకాలు కూడా, రియల్ ఎస్టేట్ రంగం పుంజుకోవడానికి మార్గం సుగమం చేస్తాయన్నది అందరికీ తెలిసిన విషయమే.

అదే సమయంలో, రాజకీయ వివాదాలు రియల్ ఎస్టేట్ రంగంపై తీవ్ర ప్రభావం చూపుతాయన్నదీ నిర్వివాదాంశం.

ప్రధానంగా రియల్ ఎస్టేట్ రంగంలో ‘ప్రాపర్టీ’ కోణంలోనూ, ‘ఫెట్టుబడి కోణంలోనూ’ ఎక్కువగా డబ్బులు ఖర్చు చేస్తుంటారు.

అయితే, పెట్టుబడిని లాభదాయక కోణంలో చూస్తారు గనుక, చిన్నపాటి ‘నెగెటివ్ ట్రెండ్’ కూడా మార్కెట్‌పై తీవ్ర ప్రభావం చూపే అవకాశాలు లేకపోలేదు.

చెప్పుకుంటూ పోతే, చాలా కారణాలున్నాయి రియల్ ఎస్టేట్ రంగం పుంజుకోవడానికీ, వెనకబడటానికీ.

విద్యార్థుల – విదేశీ విద్య, భూములకు సంబంధించిన న్యాయ పరమైన వివాదాలు.. ఇవీ ప్రస్తుతం రియల్ రంగానికి కొంత ఇబ్బందికరంగా వున్నాయి.