Vaikunta Ekadasi Uttara Dwara Darshanam.. హిందూ దేవాలయాల్లో శీఘ్ర దర్శనం, అతి శీఘ్ర దర్శనం.. అంటూ భక్తుల ముక్కు పిండి మరీ వసూళ్లకి దిగుతున్నాయ్ ప్రభుత్వాలు.
దేవాదాయ, ధర్మాదాయ.. అంటే దేవుడితో ఆదాయం.. ధర్మంతో ఆదాయం అన్నట్లు అయిపోయింది పరిస్థితి.
కలియుగ ప్రత్యక్ష దైవం వేంకటేశ్వర స్వామి కొలువై వున్న తిరుమలలో చేతి చమురు భక్తులకి ఎలా వదులుతోందో ప్రతి భక్తుడికీ అనుభవమే.
ప్రతీ ఏడాది వైకుంఠ ద్వార దర్శనం వివాదాస్పదమవుతూనే వస్తోంది. విఐఫీలకు అధిక ప్రాధాన్యత ఇస్తున్నారనీ, సామాన్య భక్తులను పట్టించుకోవడం లేదనీ, టీటీడీపై చాలా ఆరోపణలున్నాయ్.
ఉత్త ఆరోపణలు కావు. కళ్ల ముందే కనిపిస్తున్న వాస్తవమది. వైకుంఠ ఏకాదశి పర్వదినం నాడు.. వైకుంఠ ద్వార దర్శనం అత్యంత ప్రత్యేకమైనది.
Vaikunta Ekadasi Uttara Dwara Darshanam.. ఉత్తర ద్వార దర్శనం..
కేవలం ఆ రోజు మాత్రమే తెరచుకునేలా కొన్ని ప్రముఖ దేవాలయాల్లో ‘వైకుంఠ ద్వారం’ ఏర్పాటు చేయబడి వుంటుంది. ‘ఉత్తర ద్వారం’ అంటాం ఆ ప్రత్యేకమైన ద్వారాన్ని.
కేవలం వైకుంఠ ఏకాదశి రోజున మాత్రమే తెరచుకుని, ఆ తర్వాత మూసి వేయాల్సిన ద్వారం ‘ఉత్తర ద్వారం’.
ఇప్పుడేమో, ఒక్క రోజు కాదు, రెండు రోజులు కాదు.. ఏకంగా పది రోజుల పాటు వైకుంఠ ద్వార దర్శనాలకు వీలు కల్పిస్తున్నారు.
వైసీపీ హయాంలో మొదలైందీ పైత్యం. పండితుల సూచనలు తీసుకుని 10 రోజుల పాటు దర్శనాలకు అవకాశం కల్పిస్తున్నట్లు ప్రభుత్వ పెద్దలు చెబుతున్న ఈ పద్ధతి అస్సలేమాత్రం సమర్ధనీయం కాదు.
తిరుమలలో పరిస్థితి ఇలా వుంటే, తెలుగు రాష్ట్రాల్లోనూ వివిధ దేవాలయాల్లో వైకుంఠ ద్వార దర్శనమ్ పేరున ఇష్టా రీతిన టిక్కెట్ ధరలు పెట్టి భక్తులను నిలువునా దోచేస్తున్నారు.
ప్రభుత్వాలే ఈ దోపిడీని ప్రోత్సహిస్తుంటే, సామాన్య భక్తులు తమ గోడును ఎవరి దగ్గర వెల్లగక్కుకోవాలి.! అయినా భక్తులకి దైవ దర్శనాన్ని దూరం చేసే ఈ పద్ధతికి ప్రభుత్వాలు ఎందుకు తెగబడుతున్నాయ్.?
ముక్కోటి దేవతల ఆశీర్వాదం ఉత్తర ద్వారం గుండా వెళ్తే లభిస్తుందన్న భక్తుల నమ్మకాన్ని ప్రభుత్వాలు సొమ్ము చేసుకోవాలనుకోవడం శోచనీయం.
సామాన్య భక్తులు ఉత్తర ద్వార దర్శనం కోసం వైకుంట ఏకాదశి రోజున నానా అగచాట్లూ పడాల్సి వస్తోంది. అదే సమయంలో, వీఐపీలకు మాత్రం ఎంచక్కా దర్శన భాగ్యం లభిస్తోంది.
దేవుడి ముందర భక్తులు అంతా సమానమేనన్నది ఉత్తమాట. వైకుంట ఏకాదశి రోజున.. ఇది ఇంకాస్త స్పష్టంగా నిరూపితమవుతోంది.
