Ys Jagan Hyderabad Court.. వైఎస్ జగన్ మోహన్ రెడ్డి, అక్రమాస్తుల కేసు విచారణలో భాగంగా రేపు న్యాయస్థానంలో ‘నిందితుడిగా’ హాజరు కానున్నారు.!
అక్రమాస్తుల కేసు.. చాలా ఏళ్ళ క్రితం నమోదయ్యింది.! వైఎస్ రాజశేఖర్ రెడ్డి హయాంలో ‘తండ్రి అధికారాన్ని అడ్డం పెట్టుకుని అక్రమాస్తులు కూడగట్టారు’ అన్నది వైఎస్ జగన్ మీదున్న ఆరోపణ.
ఇదే కేసులో వైఎస్ జగన్ మోహన్ రెడ్డిని సీబీఐ అరెస్టు చేసింది, 16 నెలల పాటు జైల్లో రిమాండ్ ఖైదీగా కూడా వున్నారు వైఎస్ జగన్ మోహన్ రెడ్డి.
షరతులతో కూడిన బెయిల్ పొంది, క్రమంగా ఆ షరతుల్లో ఒక్కోదాన్నుంచీ ఉపశమనం పొందుతూ వచ్చారు వైసీపీ అధినేత వైఎస్ జగన్.
Ys Jagan Hyderabad Court.. ఏళ్ళ తరబడి సాగుతూ సాగుతూ..
ఏళ్ళ తరబడి, ఈ అక్రమాస్తుల కేసు విచారణ సాగుతూ సాగుతూ వస్తోంది.! ప్రజా ప్రతినిథులపై వున్న కేసుల విచారణలో వేగం పెరగాలంటూ సర్వోన్నత న్యాయస్థానం ఆదేశించినా, ప్చ్.. ఫలితం లేదు.
ఇక, రేపు కోర్టులో విచారణకు హాజరు కానున్న వైఎస్ జగన్ మోహన్ రెడ్డి కోసం వైసీపీ శ్రేణులు జన సమీకరణకు సిద్ధమవుతున్నాయి.
2014-19 మధ్య కాలంలో ప్రతిపక్ష నేతగా వున్నప్పుడు చేపట్టిన ప్రజా సంకల్ప యాత్ర (పాదయాత్ర)లో వారాంతాల్లో హైద్రాబాద్ వచ్చి, న్యాయస్థానంలో ప్రత్యక్ష విచారణకు హాజరయ్యేవారు వైఎస్ జగన్. కానీ, ఆ తర్వాత ముఖ్యమంత్రి అయ్యాక ప్రత్యక్ష విచారణకు వైఎస్ జగన్ హాజరయ్యింది లేదు.
‘జగనన్న వస్తున్నాడు.. నేను వెళుతున్నాను.. మీలో జగనన్న కోసం నాతో పాటు వచ్చేదెవరు.?’ అంటూ కొందరు వైసీపీ కార్యకర్తలు సోషల్ మీడియాలో పోస్టులు పెడుతున్నారు.
హైద్రాబాద్ రానున్న జగన్‌కి విమానాశ్రయంలో ఘన స్వాగతం పలికి, అక్కడి నుంచి ర్యాలీగా కోర్టుకు వెళ్ళాలనే ప్రయత్నాలు వైసీపీ శ్రేణులు చేస్తున్నట్లు ప్రచారం జరుగుతోంది.
గతంలో, కోర్టు విచారణకు హాజరయ్యేందుకు ‘ట్రాఫిక్ ఇబ్బందులు వస్తాయి..’ అంటూ కుంటి సాకు చూపారు వైఎస్ జగన్. అదే జగన్, ఇప్పుడు జన సమీకరణకు ఉసిగొల్పుతున్నారా.? అన్న వాదన తెరపైకొస్తోంది.
సోషల్ మీడియా వేదికగా జన సమీకరణపై వైసీపీ శ్రేణులు ప్రదర్శిస్తున్న అత్యుత్సాహం, వైఎస్ జగన్‌కి చట్ట పరంగా చిక్కులు తెచ్చేలా కనిపిస్తోంది.
దాదాపు ఆరేళ్ళ తర్వాత వైఎస్ జగన్, అక్రమాస్తుల కేసులో ప్రత్యక్షంగా కోర్టులో విచారణకు హాజరువుతున్నట్లు తెలుస్తోంది.
ఇంకెన్నాళ్ళు ఈ కేసు విచారణ సాగుతుందోగానీ, న్యాయస్థానంలో నిందితుడిగా జగన్ హాజరయ్యే వ్యవహారం, ఓ ప్రసహనంగా మారుతోందన్నది నిర్వివాదాంశం.
