Ayyappa Devotees Problems Sabarimala.. ప్రతియేటా కార్తీక మాసంలో పెద్దయెత్తున అయ్యప్ప స్వామి భక్తులు, మాలధారణ చేస్తారు. నియమ నిష్టలతో అయ్యప్ప స్వామిని పూజిస్తారు.!
మాల ధారణ నుంచి, శబరిమలలో అయ్యప్ప స్వామిని దర్శించుకునేదాకా, ఎంతో నియమ నిష్టలతో వుండే భక్తులకు ప్రతియేడాదీ కష్టాలు పెరుగుతూనే వున్నాయి శబరిమలలో.
అయ్యప్ప స్వామి భక్తుల కోసమే ప్రత్యేకంగా రైళ్ళను భారతీయ రైల్వే శాఖ నడుపుతోంది. తెలుగు రాష్ట్రాల్లోని ఆర్టీసీ కూడా, ప్రత్యేక బస్సుల్ని నడుపుతూ వస్తోంది.
ప్రైవేటు వాహనాల సంఖ్య సరే సరి.! వ్యక్తిగత వాహనాలు, అద్దెకు తీసుకునే వాహనాలు.. వేల సంఖ్యలో వుంటాయి.
అయ్యప్ప మాలను ధరించి శబరిమలకు వెళ్ళేవారే కాదు, మాల వేసుకోకుండా శబరిమలకు వెళ్ళేవారి సంఖ్య కూడా పెరుగుతోంది.
తిరుమల లాంటి పుణ్యక్షేత్రాలకు వెళ్ళడం ఓ యెత్తు.. శబరిమలకు వెళ్ళడం ఇంకో యెత్తు.! అడవుల్లో నడవాల్సి వుంటుంది శబరిమలకి వెళ్ళే భక్తులు.
శబరిమలకు వచ్చే భక్తుల కోసం ప్రతియేటా అక్కడి ప్రభుత్వం ప్రత్యేక ఏర్పాట్లు చేస్తుంటుంది. కానీ, ఆ ఏర్పాట్లకు మించి భక్తులు వస్తుంటారు.
ఇంకోపక్క, స్థానికుల నుంచి స్థానికేతర అయ్యప్ప స్వామి భక్తుల పట్ల అనుచిత ప్రవర్తన అనేది ఇటీవలి కాలంలో సర్వసాధారణమైపోయింది.
Ayyappa Devotees Problems Sabarimala.. ఎందుకింత నిర్లక్ష్యం.?
పోలీసు అధికారులూ తమతో దురుసుగా ప్రవర్తిస్తున్నారనీ, అసభ్యకరమైన రీతిలో తిడుతున్నారనీ కేరళ పోలీసులపై, తెలుగు రాష్ట్రాలకు చెందిన అయ్యప్ప భక్తులు ఆరోపిస్తుండడం గమనార్హం.
అక్కడి పరిస్థితులు ఎంత దారుణంగా వున్నా, అయ్యప్ప స్వామి మీద భక్తితో కష్టనష్టాలకోర్చి వేల సంఖ్యలో కాదు, లక్షల సంఖ్యతో తెలుగు రాష్ట్రాల నుంచి భక్తులు ప్రతియేటా కేరళకు వెళుతున్నారు.
తెలుగు రాష్ట్రాల ప్రభుత్వాలు, అలానే కేంద్ర ప్రభుత్వం కూడా, కేరళలో అయ్యప్ప స్వామి భక్తుల వెతలపై అక్కడి ప్రభుత్వంతో మాట్లాడి, సమస్యకు పరిష్కారం చూపిస్తే బావుంటుంది.
అయ్యప్ప స్వామి భక్తుల ద్వారా వివిధ రూపాల్లో కేరళ ప్రభుత్వానికి పెద్ద మొత్తంలో ఆదాయం వస్తోంది. స్థానిక వ్యాపారులూ లబ్ది పొందుతున్నారు.
కానీ, ఇతర రాష్ట్రాలకు చెందిన అయ్యప్ప భక్తులంటే, అందునా తెలుగు రాష్ట్రాలకు చెందిన అయ్యప్ప భక్తులంటే, కేరళలో చిన్న చూపు ఎందుకో మరి.?
