Table of Contents
Child Abuse Cinematic Creativity.. సినిమా అంటేనే, కళాత్మక వ్యాపారం.. అంటారు కొందరు.! అందులో నిజం లేకపోలేదు.!
కథా వస్తువులుగా, సినీ జనాలు దేన్నయినా తీసుకుంటారు. సందేశాత్మక చిత్రాలు, కళాత్మక చిత్రాలు, మాస్ సినిమాలు.. చెప్పుకుంటూ పోతే, లిస్టు పెద్దదే.!
అంతిమంగా, ప్రేక్షకుడికి ఏం కావాలో.. అది దర్శక నిర్మాతలు, నటీ నటులు, సాంకేతిక నిపుణులు.. అంతా కలిసి ఇవ్వగలిగితే, ఆ సినిమా సక్సెస్ అవుతుంది.
సక్సెస్‌కి కొలమానం ఏంటి.? అన్నది మళ్ళీ వేరే చర్చ. పెట్టిన పెట్టుబడి తిరిగొస్తే, సినిమా సక్సెస్ అయినట్లేనన్న రొటీన్ సినిమా ఈక్వేషన్ గురించే చెప్తుంటారంతా.
ఇక, ఇటీవలి కాలంలో ‘చైల్డ్ అబ్యూజ్’ అనేది కొందరు ఫిలిం మేకర్స్‌కి ‘లాభ సాటి కథాంశం’గా మారుతోంది.! ఆ దిశగానే సినిమాలు ఎక్కువగా వస్తున్నాయి.
సందేశాత్మక కోటాలో.. కాసుల కక్కుర్తి..
‘సమాజంలో మార్పు కోసం..’ అంటూ, ఈ కంటెంట్‌ని ‘సందేశాత్మక’ కోటాలో పడేస్తున్నారు.! ఆ మధ్య సాయి పల్లవి, అక్కినేని నాగచైతన్య కాంబినేషన్‌లో వచ్చిన ‘లవ్ స్టోరీ’ సినిమా కథాంశమూ ఇదే.
కొన్ని సినిమాలు ఆలోచింపజేస్తాయి, కొన్ని చిరాకు తెప్పిస్తాయి.! కథని దర్శకుడు ఎలా చెప్పాడు.? ఎలాంటి సందేశం ఇస్తున్నాడు.? అన్నదాన్ని బట్టి ‘ఆలోచింపజేయడం.. చిరాకు తెప్పించడం’ అనేవి ఆధారపడి వుంటాయి.
సమాజంలో జరుగుతున్న సంఘటనల్ని ‘కథా వస్తువులుగా’ దర్శక నిర్మాతలు ఎంచుకోవడం చూస్తున్నాం. దానికి కాస్తంత ‘గ్లామర్’ దట్టించడమే, సినీ జనాలు ‘అదనంగా’ చేసేది.!
ఒక్కోసారి, మనవి కాని కథలు.. మనకి సంబంధం లేని విషయాల్ని.. మన మీద ‘సినిమా’ రూపంలో రుద్దేయడం, వాటి ప్రభావంతో, సమాజంలో ‘కొత్త పోకడలు’ ఇవీ చూస్తుంటాం.
ప్రపంచ సినిమా చాలా చిన్నదైపోయింది ‘ఓటీటీ’ పుణ్యమా అని.! కంటెంట్‌ని ఎక్కడి నుంచైనా లేపెయ్యొచ్చు.. లేపేస్తున్నారు కూడా.!
వెబ్ సిరీస్‌లు మరీ దారుణ..
సినిమాలే కాదు, వెబ్ సిరీస్‌లూ అంతే.! వెబ్ సిరీస్‌లు ఇంకో అడుగు ముందుకేసేశాయి.! అక్కడ సెన్సార్ లేదు, దాంతో అసభ్యత అనేది హద్దులు దాటేసింది.
చాలా వెబ్ సిరీస్‌లలో ‘క్రైమ్’ అనేదే ప్రధాన కథాంశం. దానికి, చైల్డ్ అబ్యూజ్ అనేదాన్ని అదనపు పూతగా పూస్తున్నారు. ఇకనేం, సిరీస్ హిట్టు.!
ఓటీటీ కంటెంట్ కదా.. విచ్చలవిడిగా వ్యూస్ వచ్చేస్తున్నాయి. కాసుల పంట పండుతోంది. అదే సమయంలో, అవి చూసి.. క్రిమినల్స్‌గా మారుతున్నారు.. చిన్న పిల్లలు కూడా.!
తప్పెవరిది.? అంటే, కథ మళ్ళీ మొదటికి వస్తుంది. సమాజంలో జరుగుతున్నదే చూపిస్తున్నామంటారు ఫిలిం మేకర్స్.! కాదు, ‘చూసి చెడిపోతున్నారు’ అంటారు సామాన్యులు.
చట్టాలు.. నిబంధనలు.. డోన్ట్ కేర్.!
సినిమాటోగ్రఫీ చట్టాలు.. నిబంధనలు.. ఇవన్నీ ఎవరూ పట్టించుకునే పరిస్థితే లేదు. సినిమాల్లో బూతుల్ని, ‘మాస్’ అంటూ, నిర్లజ్జగా వెనకేసుకొచ్చే స్టార్ హీరోలున్నారిప్పుడు.
కామెడీ పేరుతో పసి పిల్లలతో బూతులు మాట్లాడించడం కూడా క్రియేటివిటీనే.! నిర్లజ్జగా అలాంటి కామెడీ సన్నివేశాల్ని సినిమాల్లో ప్రోత్సహిస్తున్నారు.
సో, పిల్లి మెడలో గంట కట్టడం అంత తేలిక కాదు.! ‘బాలల దినోత్సవం’ రోజున, ఆ బాల బాలికల రక్షణ కోసం లెక్చర్లు దంచేసుకుంటాం.
సినిమాలు, వెబ్ సిరీస్‌ల విషయంలో, ‘చైల్డ్ అబ్యూజ్’ కోణంలో ‘కత్తెర’ పదును చూపించలేదా సెన్సార్ బోర్డ్.? కేంద్ర, రాష్ట్ర ప్రభుత్వాలకి బాధ్యత లేదా.?
సినీ ప్రముఖులు కూడా తమ ఇళ్ళల్లోనూ చిన్న పిల్లలున్నారన్న కనీస సోయతో, సినిమాలు చేస్తే బావుంటుందేమో.!
– yeSBee
