Kaantha Review.. హీరోయిన్ భాగ్యశ్రీ బోర్సేకి.. సినిమాలో సీనెంత.? హీరో దుల్కర్ సల్మాన్ నటనా ప్రతిభ ఎంత.? నటుడు, దర్శకుడు అయిన సముద్రఖని, నటుడిగా చేసిందెంత.?
అసలు ‘కాంత’లో కథెంత.? దాని డెప్త్ ఎంత.? సెల్వమణి సెల్వరాజ్ దర్శకత్వంలో తెరకెక్కిన ‘కాంత’ సినిమాకి, తెలుగులోనూ మంచి బజ్ క్రియేట్ అయ్యింది.
రానా దగ్గుబాటి ఈ సినిమాలో ఓ కీలక పాత్రలో కనిపించిన సంగతి తెలిసిందే. ప్రోమోస్ ఇంట్రెస్టింగ్‌గానే వున్నాయి. కానీ, ఏదో వెబ్ సిరీస్‌కి ఫ్రీమేక్.. అన్న భావన కలిగింది.
‘భలే మంచి రోజు’ ఫేం వామిక గబ్బి నటించిన వెబ్ సిరీస్ అది. బ్లాక్ అండ్ వైట్ రోజుల్లో, సినిమా.. ఆ కథా కమామిషు.. వాటి చుట్టూ తెరకెక్కిన వెబ్ సిరీస్ పేరు ‘జూబ్లీ’.!
టోన్ అంతా అలానే వుంది గానీ, ‘కాంత’ ఓ డిఫరెంట్ మూవీ.! ఓ దర్శకుడు, ఓ నటుడు, ఓ నటి.. ఓ హత్య.. ఆ హత్య కేసు విచారణ.. ఇదీ, ‘కాంత’ కథాంశం.
దర్శకుడి పాత్రలో సముద్రఖని నటిస్తే, హీరో పాత్రలో దుల్కర్ సల్మాన్ నటించాడు. హీరోయిన్ భాగ్యశ్రీ బోర్సే. హత్య కేసు విచారణ చేసే అధికారి రానా దగ్గుబాటి.
Kaantha Review.. హత్య చేసిందెవరు.? ఎందుకు చేశారు.?
ఇంతకీ, ఎవరు హత్యకు గురయ్యారు.? అసలు హత్య చేసిందెవరు.? హత్య ఎందుకు జరిగింది.? ఈ ప్రశ్నలకు సమాధానాలు తెలియాలంటే, సినిమా చూడాల్సిందే.
అయినా, దర్శకుడికి అంత ఇగో ఎందుకు.? అన్న ప్రశ్న, సినిమా చూసిన వాళ్ళ మెదళ్ళను తొలిచేస్తుంది. అంటే, ఆ పాత్ర విషయంలో దర్శకుడు సరిగ్గా ఆడియన్స్‌ని కన్విన్స్ చేయలేకపోయాడన్నమాట.
ఇక, హీరో దుల్కర్ సల్మాన్ నటన గురించి కొత్తగా చెప్పేదేముంది.? చాలా మంచి నటుడు.! నటనలో ఈజ్, దుల్కర్ సల్మాన్ సొంతం. అతని నట విశ్వరూపాన్ని చూడొచ్చు.
సుముద్రఖని కూడా మంచి నటుడు.. ఆ విషయం పలు సినిమాలతో ప్రూవ్ అయ్యింది. ఈ సినిమాతో నటుడిగా ఇంకో మెట్టు పైకెక్కేశాడు.
హీరోయిన్ భాగ్యశ్రీ బోర్సేకి, నటన పరంగా మంచి పాత్ర పడిందని చెప్పొచ్చు. కళ్ళతోనే అనేక భావాల్ని పలికించింది. నటిగా, మంచి మార్కులేయించుకుంది. రానా దగ్గుబాటి మామూలే.
అంతా బాగానే వుంది కదా.? అంటే, బాలేదు.. సినిమాటోగ్రఫీ బావున్నా, సంగీతం అంత బాగా కుదరలేదు. కొన్ని చోట్ల బావున్నా, కొన్ని చోట్ల తేలిపోయింది.
ఎడిటింగ్ పరంగా లోపాలున్నాయ్. సినిమా నిడివి చాలా చాలా తగ్గించేయొచ్చు. అంతలా సాగతీత.. అదే, సినిమాకి పెద్ద శాపంగా మారింది.
బోర్.. బోర్.. బోర్.. సినిమా చూస్తున్నంతసేపూ, నటీ నటుల నటనా ప్రతిభ రిలీఫ్ అయినాసరే, అంత బోరింగ్ సినిమాని తట్టుకోవడం కష్టం.
అయోమయం తప్ప.. ఇంట్రెస్ట్ ఏదీ.?
హత్య ఎవరు చేశారు.? అన్న ప్రశ్న చుట్టూ.. అయోమయం క్రియేట్ అవుతుంది. ఎవరు చేశారన్నదానిపై ఆడియన్స్‌లో ఇంట్రెస్ట్ క్రియేట్ అయ్యాక, సినిమా వేగంగా వెళ్ళాలి.
కానీ, అక్కడి నుంచే, సినిమా కూడా నిద్రపోతుంది. ఫస్టాఫ్ బావుందనుకున్న సినిమా, సెకెండాఫ్‌కి వచ్చేసరికి నీరసించిపోయింది. నిజానికి, సెకెండాఫ్‌లోనే ఉత్కంఠ, వేగం పెరగాలి థ్రిల్లర్ సినిమాల్లో.
సినిమాకి ఎంత అవసరమో, అంతా ఖర్చు చేశారు. ఆ ఖర్చంతా తెరపై కనిపిస్తుంది. కొన్ని డైలాగ్స్ కట్టి పడేస్తాయ్.. కానీ, అవే సినిమా చూశాక, సెటైరికల్‌ అనిపిస్తాయ్.
పెయిడ్ రివ్యూలేమో, సినిమా ప్రీమియర్ ప్రారంభమవకముందే ‘సూపర్ హిట్.. సెన్సేషనల్’ అంటూ, సోషల్ మీడియాలో హోరెత్తాయ్.
సినిమా చూడటం పూర్తయ్యాక.. తలనొప్పి సినిమా.. అంటూ, అప్పటిదాకా ‘పెయిడ్ రివ్యూలు’ ఇచ్చినవాళ్ళే తలలు పట్టుకున్నారంటే, ‘కాంత’ సాగతీత ఎంత.? అన్నది అర్థమైపోలా.?
