Megastar Chiranjeevi Kodama Simham.. పాత సినిమాలకి కొత్త ‘రంగులు’ అద్దడం, సరికొత్త ‘సౌండింగ్’ జత చేయడం.. ఇవన్నీ ఇటీవలి కాలంలో చూస్తూనే వున్నాం.!
తాజాగా, సరికొత్త సాంకేతిక హంగులద్దుకుని ప్రేక్షకుల ముందుకొచ్చేందుకు సిద్ధమయ్యింది మెగాస్టార్ చిరంజీవి చాలాకాలం క్రితం నటించిన ‘కొదమ సింహం’ సినిమా.!
ఒకప్పుడు సినిమాలు వంద రోజులు, ఆపైన థియేటర్లలో ప్రదర్శితమయ్యేవి. ఇప్పుడంతా సింగిల్ వీకెండ్ సినిమాలే.!
శుక్రవారం సినిమా విడుదలైతే, సోమవారానికి థియేటర్లలో నడవడం కష్టమైపోతోన్న పరిస్థితుల్ని చూస్తున్నాం. ఎంత పెద్ద సినిమాకైనా, ఈ దుస్థితే ఎదురవుతోంది.
Megastar Chiranjeevi Kodama Simham.. వెండితెరపై సరికొత్త అనుభూతి..
ఈ క్రమంలో, పాత సినిమాలకి సరికొత్త సాంకేతిక హంగులద్దడంపై ‘ఫోకస్’ పెరుగుతోంది. ఖర్చు తక్కువ కావడంతో, రిలీజ్ చేసి, క్యాష్ చేసుకుంటున్నారు బాగానే.
‘కొదమ సింహం’ కూడా ఆ కోవలోనిదే.! మొన్నీమధ్యనే ‘శివ’ సినిమా ఇలానే ప్రేక్షకుల ముందుకొచ్చిన సంగతి తెలిసిందే.
ఇంతకీ, ‘కొదమ సింహం’ ఎలా థియేటర్లలో సరికొత్తగా సంచలనాలు సృష్టించబోతోంది.? అంటే, మెగా ఫ్యాన్స్ ఆల్రెడీ, సినిమా చూసేందుకు సన్నాహాలు చేసేసుకుంటున్నారు.. సంబరాలకు సిద్ధమవుతున్నారు.
తొలి రోజు వసూళ్ళు.. ఓవరాల్ వసూళ్ళలో.. గత చిత్రాల రికార్డుల్ని తిరగరాయాలని ఫిక్సయిపోయారు మెగాభిమానులు. ఆ సంగతి పక్కన పెడితే, ‘కొదమ సింహం’ సినిమా కథగా, ఈ తరానికి నచ్చుతుంది.
ఆ మెగా డాన్సులు.. ఆ సుప్రీం ఫైట్స్..
చిరంజీవి డాన్సులు, ఫైట్స్ గురించి కొత్తగా చెప్పేదేముంది.? తెలుగు తెరకు రిస్కీ స్టంట్స్ అద్దిన హీరో ఎవరన్నా వుంటే, అది మెగాస్టార్ చిరంజీవి మాత్రమే.!
పైగా, ఇది ‘కౌబాయ్’ తరహా కథాంశం. సినిమాలో హీరోయిన్ రోల్ కావొచ్చు, ‘సుడిగాలి’ పాత్రలో మోహన్‌బాబు కామెడీ విలనిజం కావొచ్చు.. దేనికదే ప్రత్యేకం.
ఆల్రెడీ ఓటీటీలోనూ, యూ ట్యూబ్‌లోనూ ‘కొదమ సింహం’ సినిమా అందుబాటులో వున్నా, థియేటర్లలో అభిమానుల సందడి నడుమ చూడటం అంటే, ఆ కిక్కే వేరప్పా.!
అందుకే, ‘కొదమ సింహం’ రిలీజ్‌ని చాలా గ్రాండ్‌గా ప్లాన్ చేశారు. ఆ ఒకప్పటి అద్భుతాన్ని మెగాభిమానులు ఇప్పుడు చూస్తే, కలిగే ఆశ్చర్యమే వేరు.
సరికొత్త సాంకేతిక సొబగులద్దుకున్న ‘కొదమ సింహం’ సినిమాని చిరంజీవి, డెబ్భయ్ ఏళ్ళ వయసులో చూస్తే.. ఇంకెంత అచ్చెరువొందుతారో కదా.!
