Namansh Syal HAL Tejas.. దుబాయ్ ఎయిర్ షో సందర్భంగా, భారత వైమానిక దళానికి చెందిన తేలికపాటి యుద్ధ విమానం తేజస్ కుప్ప కూలిపోయిన సంగతి తెలిసిందే.!
ముందు రోజు అత్యద్భుత విన్యాసాల్ని చేసిన తేజస్ యుద్ధ విమానం, మరుసటి రోజు ఎలా, ఎందుకు కూలిపోయిందన్నదానిపై భిన్న వాదనలు వినిపిస్తున్నాయి.
అయితే, దాదాపు 650 కోట్ల రూపాయల విలువైన యుద్ధ విమానం కుప్ప కూలిన దరిమిలా, లోతైన విచారణ జరుగుతుంది.. విచారణలో అన్ని విషయాలూ వెలుగు చూస్తాయి.
తెలుసు కదా, తేజస్ యుద్ధ విమానమంటే.. మన ఆత్మ గౌరవం లాంటిదని.! స్వదేశీ తయారీ యుద్ధ విమానమిది.! ఏళ్ళ తరబడి, ఎన్నో సవాళ్ళను ఎదుర్కొంది తేజస్ యుద్ధ విమానం.
ప్రాజెక్ట్ మొదలైనప్పటి నుంచి ఇప్పటిదాకా ఎన్నో ఒడిదుడుకుల్ని ఎదుర్కొని, భారత వైమానిక దళంలో చేరి, సేవలందిస్తోంది తేలిక పాటి యుద్ధ విమానం తేజస్.
హిందూస్థాన్ ఏరోనాటిక్స్ లిమిటెడ్, ఈ యుద్ధ విమానాల్ని తయారు చేస్తోంది. కొత్త వేరియంట్, ‘తేజస్ ఎమ్‌‌కె1ఎ’ వేరియంట్, త్వరలో భారత వైమానిక దళంలో చేరనుంది.
Namansh Syal HAL Tejas.. భవిష్యత్ తరాలకు స్ఫూర్తి..
ఇక, దుబాయ్ ఎయిర్ షో సందర్భంగా విన్యాసాలు చేస్తూ తేజస్ యుద్ధ విమానం కూలిన ఘటనలో, తేజస్‌ని నడుపుతున్న పైలట్ కూడా ప్రాణాలు కోల్పోయినట్లు ఇప్పటికే భారత వైమానిక దళం ప్రకటించింది.
యుద్ధ విమానాన్ని నడిపిన పైలట్ పేరు నమాన్ష్ సయాల్. యుద్ధ విమానాలు నడపడంలో, బోల్డంత అనుభవం ఆయన సొంతం. అందునా, తేజస్ యుద్ధ విమానం నడపడంలో సిద్ధహస్తుడు.
సాధారణంగా సాంకేతిక సమస్యలు, మానవ తప్పిదాలే.. యుద్ధ విమానాలు కూలిపోవడానికి ప్రధాన కారణాలవుతాయి.
అయితే, యుద్ద విమానం కంటే, పైలట్ ప్రాణాలే ఇలాంటి సందర్భాల్లో అత్యంత ముఖ్యమైనవిగా భావిస్తుంటారు.
అంటే, 650 కోట్ల రూపాయల విలువైన యుద్ధ విమానం కంటే, సుదీర్ఘ అనుభవమున్న పైలట్ చాలా చాలా విలువైనవాడని అర్థం.
యుద్ధ విమానాల్ని నడిపే క్రమంలో, విన్యాసాలు చేసే క్రమంలో.. శరీరంలోని ప్రధాన అవయవాల్లో చాలా మార్పులు చోటు చేసుకుంటాయి. రక్త ప్రసరణ సహా, అనేక అంశాలు.. తీవ్ర ప్రభావానికి గురవుతాయి.
అవే, ప్రమాదాలకు కారణమవుతుంటాయని రక్షణ రంగ నిపుణులు అభిప్రాయపడుతున్నారు. కాగా, మంచి స్నేహితుడ్ని కోల్పోయామని నమాన్ష్ సయాల్ స్నేహితులైన పైలట్లు చెబుతున్నారు.
యుద్ధంలో వీరమరణం పొందడంతో సరిసమానమైన ఘనత నమాన్ష్ సయాల్‌కి దక్కుతుందన్నది రక్షణ రంగ నిపుణుల వాదనగా కనిపిస్తోంది.
నిజమే, వైమానిక దళంలో పైలట్‌గా పని చేయాలనుకుంటున్నవారికి, ఇలాంటి త్యాగాలు స్ఫూర్తిగా నిలుస్తాయి. దేశం గర్వించదగ్గ ఫైటర్ ఎయిర్‌క్రాఫ్ట్ పైలట్‌గా నమాన్ష్ సయాల్ చరిత్రలో నిలిచిపోతారు.
థాంక్యూ నమాన్ష్ సయాల్.. సద్గతి ప్రాప్తిరస్తు.!
