YS Jagan Hyderabad Show.. వైఎస్ జగన్ మోహన్ రెడ్డి, అక్రమాస్తుల కేసు విచారణ నిమిత్తం హైదరాబాద్ వచ్చారు. న్యాయస్థానం యెదుట నిందితుడిగా విచారణకు హాజరయ్యారు.
దాదాపు ఆరు సంవత్సరాల తర్వాత వైఎస్ జగన్, కోర్టులో ప్రత్యక్షంగా విచారణకు హాజరయ్యారు. ప్రత్యక్ష విచారణ నుంచి తప్పించుకునేందుకు,
రకరకాల కుంటి సాకులు చెబుతూ వచ్చారు వైఎస్ జగన్ మోహన్ రెడ్డి. కానీ, తప్పలేదు.. కోర్టుకు హాజరు కావాల్సి వచ్చింది.
ప్రత్యేక విమానంలో హైద్రాబాద్‌లో ల్యాండ్ అయిన వైఎస్ జగన్ మోహన్ రెడ్డి, భారీ సమీకరణ మధ్య బలప్రదర్శన చేశారు.
‘అన్న వస్తున్నాడు.. నేను వెళుతున్నాను.. నాతో వచ్చేదెవరు.?’ అంటూ సోషల్ మీడియా వేదికగా వైసీపీ శ్రేణులు పెద్దయెత్తున ప్రచారం నిర్వహించుకున్నారు.
తెరవెనుకాల వైసీపీ ముఖ్య నాయకులు, ఈ జన సమీకరణకు ఆర్థికంగా సహాయ సహకారాలు అందించారు.
ఏపీ నుంచి ముందుగానే హైద్రాబాద్ చేరుకున్న వైసీపీ కార్యకర్తలు, విమానాశ్రయం వద్ద నానా హంగామా చేశారు. దాంతో, ట్రాఫిక్ ఇబ్బందులు తలెత్తాయి.
పరిస్థితిని ముందే ఊహించిన హైద్రాబాద్ పోలీస్, ట్రాఫిక్‌ని క్రమబద్ధీకరించేందుకు తగు చర్యలు కూడా చేపట్టారు. వైసీపీ కార్యకర్తల్ని నిలువరించేందుకూ ప్రయత్నించారు.
ఈ హంగామా అనంతరం వైఎస్ జగన్, న్యాయస్థానం యెదుట విచారణకు హాజరయ్యారు. విచారణ ముగిశాక, న్యాయస్థానం నుంచి హైద్రాబాద్‌లోని తన నివాసం లోటస్ పాండ్‌కి వెళ్ళిపోయారు.
దాంతో, వైఎస్ జగన్ హైద్రాబాద్‌లో తలపెట్టిన జన సమీకరణ – బల ప్రదర్శన కార్యక్రమం సుఖాంతమయ్యింది. ఇంతకీ, ఈ బల ప్రదర్శన – జన సమీకరణతో వైఎస్ జగన్ ఏం సాధించినట్లు.?
‘ఏపీ కంటే తెలంగాణలోనే కల్ట్ ఫ్యాన్స్ వున్నారు జగనన్నకి.. జగనన్న కారణ జన్ముడు.. రప్పా రప్పా..’ అంటూ ఫ్లెక్సీలతో వైసీపీ కార్యకర్తలు ఈ బలప్రదర్శనలో చేసిన పబ్లిసిటీ స్టంట్లు అన్నీ ఇన్నీ కావు.
అయితే, అక్రమాస్తుల కేసులో ఏ1 నిందితుడిగా విచారణకు హాజరైన వైఎస్ జగన్, ఇలా బల ప్రదర్శనకు దిగడం ద్వారా, నెగెటివిటీనే మూటగట్టుకున్నారన్నది నిర్వివాదాంశం.
‘హైద్రాబాద్‌లో త్వరలో జరగబోయే జీహెచ్ఎంసీ ఎన్నికల్లో కార్పొరేటర్‌గా ఏమైనా పోటీ చేస్తారా జగన్.?’ అంటూ సోషల్ మీడియాలో సెటైర్లు పడుతున్నాయి.
ఏపీలో రాజకీయాల్ని వదలేసి, హైద్రాబాద్‌లో సెటిలైపోయి.. తెలంగాణలో ఇకపై జగన్ రాజకీయాలు చేయనున్నారా.? అంటూ మరికొన్ని కామెంట్స్ వినిపిస్తున్నాయి సోషల్ మీడియా వేదికగా.
ఎటూ, ఏపీ అసెంబ్లీ సమావేశాలకు హాజరవడం లేదు గనుక, ఎమ్మెల్యే పదవికి రాజీనామా చేసి.. ఏదో ఒక డివిజన్ నుంచి కార్పొరేటర్‌గా జగన్ పోటీ చేయడమే బెటర్.. అన్న చర్చ వైసీపీ శ్రేణుల్లో కూడా జరుగుతోంది.
