Table of Contents
8 Vasantalu Review.. సినిమా ప్రమోషనల్ ఈవెంట్‌లో నటి అనంతిక తన మార్షల్ ఆర్ట్స్ ప్రావీణ్యాన్ని చాటుకుని, అందర్నీ ఆశ్చర్యపరిచింది.
అంటే, సినిమా నిండా యాక్షన్ సీక్వెన్సెస్ వుంటాయేమో.. అని చాలామంది అనుకోవచ్చుగాక.! కానీ, ఇదొక ఎమోషనల్ జర్నీ.. అని, సినిమా ప్రారంభమయిన చాలా సేపటికి గాని అర్థం కాదు.
‘ఇంత సాగతీత ఏంటి.?’ అంటూ, ఓటీటీలో సినిమా మొదలు పెట్టిన చాలామంది వెంటనే, వేరే కంటెంట్ వైపు వెళ్ళిపోవడం సర్వసాధారణం.
అలానే, నేను కూడా నెల రోజుల తర్వాత మళ్ళీ, ఎందుకో చూడాలనిపించి.. అంతకు ముందు ఎక్కడ ఆపేశానో, అక్కడి నుంచి చూడటం మొదలు పెట్టాను.
సినిమా నడుస్తోంది.. నడుస్తూనే వుంది.. మెల్లగా కథలో లీనమవడం మొదలైంది.. కంటెంట్‌కి బాగా కనెక్ట్ అయిపోయా.! హీరోయిన్.. అనడం కంటే, కథా నాయిక.. అనడం కరెక్టేమో.
ఆమెని, అర్థవంతంగా ఉపయోగించుకున్న దర్శకుడు..
అనంతిక, కథానాయిక పాత్రలో ఒదిగిపోయిన తీరు, ఆశ్చర్యపరుస్తుంది. హీరోయిన్‌కి మార్షల్ ఆర్ట్స్‌లో వున్న ప్రవీణ్యాన్ని దర్శకుడు చాలా తెలివిగా వాడుకున్నాడు.
ఓ యాక్షన్ ఎపిసోడ్‌లో మాత్రమే, ఆమె మార్షల్ ఆర్ట్స్ ప్రావీణ్యం పూర్తిగా మనకి కనిపిస్తుంది. ప్రారంభంలో ఓ సన్నివేశం కూడా వుందండోయ్, యాక్షన్ బ్యాక్‌డ్రాప్‌లో. అయితే, అది చాలా చిన్నది.
మార్షల్ ఆర్ట్స్ ప్రావీణ్యాన్ని పక్కన పెట్టి, సహజమైన నటన కోణంలోనే హీరోయిన్‌ని దర్శకుడు ఎంపిక చేసినట్లు మనకి, సినిమా అంతటా అనిపిస్తుంటుంది.
నటీనటుల్లో కొందరి నటన ఫోర్స్‌డ్‌గా అనిపిస్తుందిగానీ, కథలో కనెక్ట్ అయితే.. ఆ పాత్రలన్నీ వేటికవే చాలా భిన్నమైనవన్న భావన కలుగుతుంది.
మార్షల్ ఆర్ట్స్ గురువు, ప్రాణాంతక వ్యాధితో బాధపడుతూ, తన మరణానంతరం తన శిష్యురాలికి నేర్పిన ‘విద్య’ రూపంలో జీవించి వుంటానని చెప్పే మాట, గుండె లోతుల్లో టచ్ చేస్తుంటుంది.
ప్రేమికుడు.. ప్రేమికురాలు..
ప్రేమించిన వాడు తనను వదిలించుకోవాలనుకున్నప్పుడు, ప్రేమికురాలు పడే ఆవేదన, అందులోంచి ఆమె తనను తాను బయటకు తీసుకొచ్చుకున్న వైనం.. ఆలోచింపజేస్తుంది.
స్నేహితురాలి గురించి స్నేహితుడు, స్నేహితుడి గురించి స్నేహితురాలు.. ప్రేమికుడి గురించి ప్రియురాలు, ప్రియురాలిని ఆరాధించే ప్రేమికుడు.. ఇలా ప్రతి పాత్రా ప్రత్యేకమే.
Also Read: డేటింగు.! గాసిప్పింగు.! అనుపమకే ఎందుకిలా.!
ప్రీ క్లయిమాక్స్ దగ్గర్నుంచి ఎమోషనల్ రైడ్ అయితే, వేరే లెవల్.! ఏడిపించే సన్నివేశాలు కాదు.. మనసుని గట్టిగా కదిలించే సన్నివేశాలవి.
తెరపై ‘ప్రేమ’ని చూపించాలంటే, కామోద్రేకంతో ఊగిపోవడం.. అని కొందరు దర్శకులు అనుకుంటారు. లిప్ లాక్ సీన్స్ లేకపోతే, బలమైన ప్రేమ కథ చెప్పలేమనుకునే మూర్ఖత్వం ఇంకొందరిది.
కానీ, ‘8 వసంతాలు’ డైరెక్టర్, అలాంటి పైత్యాల్ని నమ్ముకోలేదు.! ఓ క్లీన్ ఎంటర్టైనర్ తెరకెక్కించాడు. నేటి యువతకి స్ఫూర్తినిచ్చే సినిమా ఇది.!
టెక్నికల్‌గా చాలా బావుంది..
మాటలు, ఎడిటింగ్, సినిమాటోగ్రఫీ, పాటలు అలానే బ్యాక్‌గ్రౌండ్ స్కోర్.. ఇలా అన్నీ దేనికదే ప్రత్యేకం.. అన్నట్లున్నాయ్.!
మాటలు ఎంత కవితాత్మకంగా వున్నాయో, పాటల్లోని లిరిక్స్ కూడా అంతే అర్థవంతంగా వున్నాయి. మ్యూజిక్ ఎంత బావుందో, పాటల్ని అంతే అందంగా చూపించింది సినిమటోగ్రఫీ.!
సినిమాకి ఏది ఎంత అవసరమో, అంత మేరకు.. అన్ని విభాగాలూ పెర్‌ఫెక్ట్‌గా వర్క్ చేశాయి. సాంకేతిక వర్గం నుంచి దర్శకుడికి ఫుల్ సపోర్ట్ లభించింది.
నిర్మాత, సినిమాకి ఏం అవసరమో, అన్నీ సమకూరిస్తే ఇలాంటి మంచి ఔట్ పుట్ ఖచ్చితంగా వస్తుందని ఓ చిన్న సినిమా ప్రూవ్ చేయడం గొప్ప విషయమే కదా.!
గమనిక: ‘8 వసంతాలు’ పాటల్ని విన్న ప్రతిసారీ, సినిమాని ఇంకోసారి చూడాలనిపిస్తుందంటే, అతిశయోక్తి కాదేమో.!
‘అందమా’ పాట మాత్రమే కాదు, గాయని చిత్ర ఆలపించిన ‘పరిచయమిలా’ పాట మనల్ని వెంటాడుతుంది.
కొన్ని సినిమాలకు రివ్యూ రాసినప్పుడు.. ఓ రకమైన మధురానుభూతి కలుగుతుంటుంది. ‘8 వసంతాలు’ రివ్యూ రాస్తున్నప్పుడే, అదే అనుభూతి కలిగింది.
దాదాపు నాలుగు నెలల క్రితం రాయాలనుకున్న రివ్యూ.. కాస్త ఆలస్యంగా వచ్చింది. ఓ మంచి సినిమా చూడ్డానికి ఇంత ఆలస్యమయ్యిందా.? అన్న భావన కలుగుతోంది.!
- yeSBee
