Table of Contents
Ahobilam Temple Secrets.. హిందూ ధర్మంలో కొన్ని కొన్ని దైవ క్షేత్రాలకు కొన్ని కొన్ని ప్రత్యేకతలున్నాయ్. వాటిలో మనకు తెలియని కొన్ని మిస్టీరియస్ గాధలు కూడా వున్నాయ్.
అలాంటి ఓ పుణ్య క్షేత్రానికి సంబంధించి ఇప్పుడు మనం చర్చించుకుందాం. శ్రీ మహా విష్ణువు దశావతారాల్లో ఒకటి నరసింహ అవతారం.
స్వయానా స్వామి.. నరసింహావతారంలో వెలిసిన క్షేత్రమే ‘అహోబిలం’ .!
ఆ అహోబిలం క్షేత్రంలో సైన్స్‌కి అంతు చిక్కని ఎన్నో రహస్యాలు దాగున్నాయ్. అలాగే, కొండల మధ్యన చిక్కని అటవీ ప్రాంతంలో ప్రకృతి రమణీయమైన ప్రదేశంలో కొలువు తీరిందీ పుణ్య క్షేత్రం.
Ahobilam Temple Secrets.. అసలు ‘అహోబిలం’ అంటే ఏంటీ.?
‘అహో’ అంటే అద్భుతమైన అని అర్ధం.. ‘బిలం’ అంటే గుహ అని అర్ధం. ఇది ఆంధ్ర ప్రదేశ్‌లోని నంధ్యాల జిల్లాలో కొలువు తీరిన అత్యంత పవిత్రమైన వైష్ణవ పుణ్య క్షేత్రం.
రాక్షసుల రాజైన హిరణ్యకశిపుడు, తన కుమారుడు ప్రహ్లాదుడ్ని హింసించే క్రమంలో చిన్నారి ప్రహ్లాదుడ్ని కాపాడడానికి స్వయానా విష్ణు మూర్తి వస్తారు.
శ్రీ మహావిష్ణువు నారసింహ అవతారంలో స్థంభం నుంచి వెలువడి హిరణ్యకశిపుడ్ని సంహరించిన ప్రదేశమే ‘అహోబిలం’గా చెబుతారు.
ఆ సమయంలోనే నారసింహుడి శక్తినీ, బలాన్ని చూసి దేవతలు ఆశ్చర్యంతో ఆహా ఎంత బలం.. అని కీర్తించారట. అలా ఈ క్షేత్రానికి దేవతల సైడ్ నుంచి ‘అహోబలమ్’ అనే నామం కూడా వుందని పురాణాల్లో ప్రస్థావన వుంది.
అలాగే, ఓ పెద్ద గుహలో స్వామి స్వయంభువుగా వెలిశాడు కాబట్టి.. ‘అహో బిలం’గానూ ఈ క్షేత్రాన్ని అభివర్ణిస్తారు.
ప్రత్యేకతలు
అహోబిల క్షేత్రాన్ని రెండు భాగాలుగా విభజించారు. ఎగువ అహోబిలం, దిగువ అహోబిలం. ఎగువ అహోబిలంలో స్వామి వారి ఉగ్ర రూపాన్ని చూడొచ్చు.
దిగువ అహోబిలంలో నారసింహుడు శాంత స్వరూపుడై భక్తులకు దర్శనమిస్తాడు. ఇక్కడి మరో ప్రత్యేకత నవ నారసింహులు.
తొమ్మిది రూపాల్లో నరసింహ స్వామి దర్శనమిస్తాడు. ఈ తొమ్మిది రూపాలనూ దర్శించుకోవడం ఏమంత సులభమైన ప్రక్రియ కాదు.
అందుకు తొమ్మిది గుహలను దర్శించాల్సి వుంటుంది. పచ్చని అడవిలో.. కొండలు, గుట్ల మధ్య ప్రయాణం చేయాల్సి వుంటుంది. ఇది ఒకింత ఖర్చు మరియు శ్రమతో కూడిన పని.
మిస్టరీ
హిరణ్యకశిపుడిని, నారసింహ (సగం నరుడు, సగం సింహం) రూపంలో విష్ణు మూర్తి సంహరించిన స్థంభం. ఈ స్థంభాన్ని ‘ఉగ్ర స్థంభం’గా పిలుస్తారు.
ఈ ప్రదేశాన్ని చేరుకోవడం అత్యంత కష్టతరం. చాలా తక్కువ మంది భక్తులు మాత్రమే ఈ ప్రదేశాన్ని దర్శించగలిగినట్లు చెబుతారు.
ఈ ఉగ్ర స్థంబాన్ని చేరుకునే మార్గంలో అనేక రహస్య మార్గాలూ, గుహలు వున్నట్లు చెబుతారు. వాటి ఉనికి చాలా తక్కువ మందికి మాత్రమే తెలుసని అంటారు.
అంతేకాదు, ఈ క్షేత్రంలో ఎంతో విలువైన గుప్త నిధులున్నట్లుగా గుర్తించారు. కానీ, వాటిని దక్కించుకోవడం ఎవ్వరి తరమూ కాలేదట.
టెక్నాలజీ ఎంతగా అభివృద్ధి చెందినప్పటికీ ఈ దేవాలయంలోని నిధిని కనిపెట్టలేకపోయారట.
అహోబిల మఠానికి చెందిన ఆరవ పీఠాధిపతి ఈ ఆలయ ప్రాంగణంలోనే సజీవ సమాధి అయ్యారని చెబుతారు.
ఆ సమయంలో ఆయన తనతో పాటూ అపారమైన ధనం, బంగారం వంటి సంపదను తనతో పాటూ తీసుకెళ్లిపోయారనీ ఇక్కడి స్థానికుల నమ్మకం.
కొన్ని వేల కోట్ల విలువైన ఈ గుప్త నిధిని వెలికి తీసేందుకు గతంలో చాలా ప్రయత్నాలు జరిగాయట. కానీ, అవేమీ ఫలించలేదనీ, దాంతో ఆ సంపద వివరాలు మిస్టరీగానే మిగిలిపోయాయనీ చెబుతారు.
ప్రకృతి రమణీయత
నల్లమల అడవులలో కొలువైన ఈ క్షేత్రం చుట్టూ కొండలూ, గుహలు, వాటి మధ్యలో పారే అందమైన జలపాతాలతో చూడచక్కని రమణీయతను సంతరించుకుంది.
అంతేకాదు ఇక్కడి కొండలు చూసేందుకు ఆదిశేషుడి ఆకృతిలో పవళించినట్లుగా వుంటాయని ప్రతీతి. అంతేకాదు, ఎన్నో అరుదైన వృక్షాలకు ఈ ప్రాంతం ప్రసిద్ధి.
ఈ క్షేత్రాన్ని దర్శించుకోవడం కేవలం ఆధ్యాత్మిక భావనే కాదండోయ్.. ఇక్కడి ప్రకృతికి మంత్ర ముగ్ధులై పులకించిపోవచ్చు. అంతేకాదు ఇదో సాహస యాత్ర అనే అనుభూతి కలగడంలోనూ ఆశ్చర్యం లేదు.
అహోబిలం క్షేత్రాన్ని సందర్శించడానికి.. రోడ్డు మార్గం అందుబాటులో వుంది. చాలా అద్భుతాలు ఇక్కడ కొలువు దీరి వున్న నేపథ్యంలో, కొంత ఎక్కువ సమయం కేటాయించేలా టూర్ ప్లాన్ చేసుకోవడం మంచిది.
