Ibomma Piracy Ravi Arrested.. ఐబొమ్మ గురించి తెలియనివారు ఎవరైనా వున్నారా.? ఎందుకుంటారు.? ఉచితంగా, సినిమాలు అందులో దొరుకుతోంటే.!
థియేటర్లకు వెళ్ళడమెందుకు దండగ, ఐ బొమ్మ వుండగా.. అనే మాట తరచూ వినిపిస్తుంటుంది. సినిమాల ప్రీమియర్ షోస్ సందర్భంగా కూడా, ఈ ‘ఐ బొమ్మ’ చర్చ జరుగుతుంటుంది.
ఇలా ప్రీమియర్ షో పడగానే, అలా ఐ-బొమ్మలో సినిమా అందుబాటులోకి వచ్చేస్తుంటుంది. ప్రీమియర్ షోస్‌కి వెళ్ళడాన్నీ కష్టంగా భావించే కొంందరు, ఐ-బొమ్మలో చూసేసి, రివ్యూలు ఇచ్చేస్తుంటారు.
అసలు ‘ఐ-బొమ్మ’ నిర్వాహకులకి ఆదాయం ఎలా వస్తుంది.? ఇదో మిలియన్ డాలర్ క్వశ్చన్. ఐ-బొమ్మ నిర్వాహకుడు ఇమ్మది రవిని తాజాగా అరెస్ట్ చేశారు.
అతని దగ్గర నుంచి కోట్లాది రూపాయల సొమ్మునీ, బోల్డన్ని హార్డ్ డిస్క్‌లనీ, ఇతర సాంకేతిక పరమైన సామాగ్రినీ పోలీసులు స్వాధీనం చేసుకున్నట్లు ప్రచారం జరుగుతోంది.
Ibomma Piracy Ravi Arrested.. సవాల్ చేశాడు.. దొరికిపోయాడు..
‘దమ్ముంటే నన్ను అరెస్ట్ చేయండి.. నేను అరెస్టయితే, చాలామంది బాగోతాలు బయటపడతాయ్..’ అంటూ ఐ-బొమ్మ రవి, పోలీసులకు సైతం సవాల్ విసరడం గమనార్హం.
దాంతో, పోలీసులు ఈ కేసుని అత్యంత ప్రతిష్టాత్మకంగా తీసుకున్నారు. ఐ-బొమ్మ రవి సవాల్ విసిరిన కొద్ది రోజుల్లోనే, సైబర్ క్రైమ్ పోలీసులు అతన్ని అరెస్ట్ చేశారు.
వందల కోట్లు.. వేల కోట్ల స్కామ్ ఈ ‘ఐ-బొమ్మ’ ద్వారా జరుగుతోందన్న అనుమానాలు వ్యక్తమవుతున్నాయి. స్మగ్లింగ్, డ్రగ్స్, బెట్టింగ్.. ఇలా అనేక అక్రమాలు, ఈ పైరసీ ముసుగులో జరుగుతున్నాయి.
దాంతో, ఇక ‘పైరసీ భూతానికి’ చెక్ పడినట్లేనన్న చర్చ తెలుగు సినీ పరిశ్రమలో జరుగుతోంది. వాస్తవానికి, తెలుగు సినిమాలే కాదు.. దాదాపు అన్ని సినిమాల్నీ పైరసీ చేస్తోంది ఐ‘బొమ్మ.
మెగాస్టార్ చిరంజీవి, అక్కినేని నాగార్జున, రాజమౌళి సహా పలువురు ప్రముఖులు ‘ఐ-బొమ్మ’ నిర్వాహకుడు రవి అరెస్టుపై హర్షం వ్యక్తం చేశారు.
కేసుని ప్రతిష్టాత్మకంగా తీసుకుని, తక్కువ సమయంలోనే ఐ-బొమ్మ నిర్వాహకుడిని అరెస్టు చేయడాన్ని సినీ ప్రముఖులు అభినందించారు.
‘ఫ్రీగా సినిమాని ఐ-బొమ్మలో చూస్తున్నామని అనుకోవద్దు. మీ డేటా దొంగిలించబడుతోంది.. మీ జీవితాలు రోడ్డున పడతాయి..’ అని దర్శకుడు రాజమౌళి హెచ్చరించాడు.
