KCR Rename TRS ASAP ఏ ముహూర్తాన తెలంగాణ రాష్ట్ర సమితి పేరు మార్చి, భారత రాష్ట్ర సమితి.. అని పెట్టుకున్నారో, అప్పుడే గులాబీ పార్టీ పతనం ప్రారంభమైంది.!
పేరులో ఏముంది.? అంటే, ఎందుకు లేదు.? చాలా వుంది. ‘తెలంగాణ’ కంటే, పవర్‌ఫుల్ పేరు, గులాబీ పార్టీకి ఇంకేముంటుంది తెలంగాణలో.?
జాతీయ రాజకీయాల్లో చక్రం తిప్పడానికి, ‘తెలంగాణ’ అనే ప్రాంతీయ పేరు అడ్డం వస్తుందని ‘గులాబీ బాస్’ కేసీయార్ అనుకున్నారుగానీ, స్థానికంగా అది తమను కోలుకోలేని దెబ్బ తీస్తుందని అంచనా వేయలేకపోయారు.
KCR Rename TRS ASAP.. డ్యామేజ్ కంట్రోల్ ఎలా.?
తెలంగాణ రాష్ట్ర సమితి అంటే, ‘ఇంటి పార్టీ’ అనే పేరు, తెలంగాణ ప్రజల్లో బలపడిపోయింది. తెలంగాణ ఉద్యమంలో, గులాబీ పార్టీకి జనం జేజేలు పలికింది ఇందుకే.
‘తెలంగాణ రాష్ట్ర సమితి.. అంటే, ఇది మన పార్టీ.. మన తెలంగాణ ప్రజల పార్టీ..’ అనే ముద్రని గులాబీ బాస్.. బలంగా, చాలా బలంగా వేయగలిగారు.
కానీ, ఇప్పుడేంటి పరిస్థితి.? బీఆర్ఎస్ పేరు జనాల్లోకి వెళ్ళలేదని కాదు, వెళ్ళినా.. జనం, ఆ పేరుతో కనెక్ట్ కాలేకపోతున్నారు. తెలంగాణ పార్టీ అంటే, తెలంగాణ రాష్ట్ర సమితి.. అన్న భావన ఒకప్పుడు వుండేది.
రోజు రోజుకీ, గులాబీ పార్టీ ఇమేజ్ పాతాళానికి, మరింత దిగువకి జారిపోతూనే వుంది. జూబ్లీహిల్స్ ఉప ఎన్నికల్లో సిట్టింగ్ స్థానాన్ని నిలబెట్టుకోలేకపోవడం, గులాబీ పార్టీ పతనానికి పరాకాష్ట.
గులాబీ బాస్ కేసీయార్, జూబ్లీహిల్స్ ఉప ఎన్నికల్లో కనిపించలేదు. వృద్ధాప్యం, ఇతరత్రా అనారోగ్య సమస్యలు.. అని గులాబీ శ్రేణులు సరిపెట్టుకోలేకపోతున్నాయి.
కొత్తగా, బీఆర్ఎస్ పార్టీలో కవిత కుంపటి.. ఆ పార్టీని మరింత కష్టాల్లోకి నెట్టేసింది. కేటీయార్, హరీష్ రావు.. ఈ ఇద్దరే పార్టీని ముందుకు నడిపించాల్సి వస్తోంది.
అందులో, హరీష్ మీద కవిత మోపిన నిందారోపణల నేపథ్యంలో, గులాబీ శ్రేణులు మరింత అయోమయానికి గురవుతున్నాయి. కేటీయార్, ఇదివరకటిలా ధీటైన రాజకీయాలు చేయలేకపోతున్నారు.
ఆలస్యం అమృతం విషం..
తెలంగాణలో వరుసగా రెండు సార్లు అధికారంలోకి వచ్చిన గులాబీ పార్టీ, నానాటికీ పతనమైపోతుండడాన్ని గులాబీ శ్రేణులు అస్సలేమాత్రం జీర్ణించుకోలేకపోతున్నాయన్నది నిర్వివాదాంశం.
ఈ పరిస్థితుల్లో, తిరిగి పాత పేరే పార్టీకి పెట్టుకోవడం మంచిదన్న చర్చ గులాబీ శ్రేణుల్లో జరుగుతోంది. కానీ, అందుకు గులాబీ బాస్ కేసీయార్ సుముఖంగా వున్నారా.? అన్నదే మిలియన్ డాలర్ క్వశ్చన్.
జాతీయ రాజకీయాల్లో చక్రం తిప్పడం కాదు కదా, తన ఉనికిని సైతం కాపాడుకోలేని పరిస్థితుల్లోకి దిగజారిపోయింది గులాబీ పార్టీ. లోక్ సభలో గులాబీ పార్టీకి ప్రాతినిథ్యమే లేదిప్పుడు.!
పొలిటికల్‌గా గేరు మార్చాలి.. తెలంగాణలో గులాబీ పార్టీ తిరిగి పుంజుకోవాలంటే, మళ్ళీ రి‘పేరు’ తప్పదు.! భారత రాష్ట్ర సమితి, తిరిగి తెలంగాణ రాష్ట్ర సమితిగా మారాల్సిందేనేమో.!
ఆలస్యం అమృతం విషం.!
