Chandrababu Jagan Dangerous Ruling.. చంద్రబాబు పాలన అత్యంత ప్రమాదకరమని అంటోంది వైఎస్సార్ కాంగ్రెస్ పార్టీ.!
కాదు కాదు, వైఎస్ జగన్ పాలనే ప్రమాదకరం.. అన్నది తెలుగు దేశం పార్టీ వాదన.!
ఇంతకీ, ఎవరి పాలన ప్రమాదకరం.? ఈ విషయమై ఎవరి వాదన వారిదే.! ఇద్దరిదీ ప్రమాదకరమే.. అనేవారూ లేకపోలేదు.!
పరిపాలన అంటే బాధ్యత.! రాజకీయమంటే ప్రజా సేవ.! కానీ, రాజకీయాల్లో ప్రజా సేవ కనిపించడంలేదు.. పరిపాలనలో బాధ్యత లేదు.. అన్నది, నేటి రాజకీయాల్ని చూస్తే ఎవరైనా ఇట్టే చెప్పేసే విషయం.
Chandrababu Jagan Dangerous Ruling.. వైసీపీ హయాంలో దాడులు..
టీడీపీ నేతల మీద వైసీపీ హయాంలో దారుణమైన దాడులు జరిగాయి. భౌతిక దాడులకు తెగబడ్డారు వైసీపీ నాయకులు.! హత్యాయత్నాలు, హత్యలూ జరిగాయి.
రాజకీయ ప్రత్యర్థులపై వైసీపీ హయాంలో నమోదైన అక్రమ కేసులు అన్నీ ఇన్నీ కావు. కస్టోడియల్ టార్చర్ ఆరోపణలూ వైసీపీ హయాంలో చాలా ఎక్కువగా వినిపించాయి.
టీడీపీ రాష్ట్ర కార్యాలయంపై వైసీపీ శ్రేణులు దాడులకు తెగబడ్డాయి. ఈ క్రమంలో, టీడీపీ కార్యాలయం ధ్వంసమైంది. టీడీపీ కార్యకర్తలు, కార్యాలయ సిబ్బంది రక్తమోడారు.
ఇంత దారుణం జరిగితే, ‘అభిమానస్తులకు బీపీ వచ్చింది..’ అంటూ, ఆ దాడిని సమర్థించుకున్నారు అప్పటి ముఖ్యమంత్రి వైఎస్ జగన్ మోహన్ రెడ్డి.
వైసీపీ నేతలు, అది తమ వీరత్వం.. అన్నట్లు చెప్పుకున్నారు. చంద్రబాబు ఇంటిపైకి వైసీపీ నేత ఒకరు దాడికి వెలితే, ఆ వైసీపీ నేతకు మంత్రి పదవి ఇచ్చారు వైఎస్ జగన్.!
చంద్రబాబు పాలనలో ఏం జరుగుతోంది.?
చంద్రబాబు హయాంలోనూ రాజకీయ దాడులు జరుగుతున్నాయి. వైసీపీ వర్సెస్ టీడీపీ.. ఈ పంచాయితీ కొనసాగుతూనే వుంది.
కులాల కుంపట్లు రాజేస్తున్నారు.. మతోన్మాదంతో చెలరేగిపోతున్నారు.! ఇరువైపుల నుంచీ జరుగుతోంది ఈ దాడుల వ్యవహారం.
మరి, ప్రభుత్వం ఈ దాడుల్ని నియంత్రించాలి కదా.? అంటే, నియంత్రిస్తూనే వున్నామని టీడీపీ చెబుతోంది. దాడుల్ని ప్రోత్సహించేది లేదని ముఖ్యమంత్రి చంద్రబాబు తెగేసి చెబుతున్నారు.
అయితే, గ్రౌండ్ లెవల్‌లో పరిస్థితులు వేరేలా వున్నాయి. సమస్య తీవ్రత తక్కువేమీ కాదు. దాన్ని వైసీపీ, బూతద్దంలో చూపించడం సహజమే. ఇది రాజకీయం.
‘మీ హయాంలో జరిగిందేంటి.?’ అని టీడీపీ బుకాయిస్తే, అర్థం లేదు. ఎందుకంటే, ప్రజలు అన్నీ గమనిస్తారు. వైసీపీ హయాంలోని అరాచకాలకే, చెంప పెట్టులాంటి తీర్పునిచ్చారు 2024 ఎన్నికల్లో జనం.
అలాంటి తీర్పునే, టీడీపీకి వ్యతిరేకంగా వచ్చే ఎన్నికల్లో ప్రజలు ఇవ్వాలని ముఖ్యమంత్రి చంద్రబాబు కోరుకుంటారా.? అన్నదే కీలకం ఇక్కడ.!
అధికారంలో వున్నప్పుడు విర్రవీగి, ప్రతిపక్షంలో వున్నప్పుడు అమాయకత్వం నటించడం వైఎస్ జగన్ మార్కు రాజకీయం.! ప్రజలు, అన్నీ గమనిస్తారు.!
అదే సమయంలో, తన హయాంలో జరుగుతున్న తప్పుల్ని, చంద్రబాబు ఉపేక్షిస్తే.. టీడీపీ రాజకీయ భవిష్యత్తుకి స్వయంగా సమాధి కట్టుకున్నట్లే అవుతుంది.
పరిపాలన, ప్రమాదకరం కాకూడదు.. ఎవరు పరిపాలించినాసరే.! పరిపాలన అంటే బాధ్యత.! అధికారంలో ఎవరున్నా బాధ్యతను గుర్తెరిగి ప్రవర్తించాలి.
