Pawan Kalyan Konaseema Kobbari.. కోనసీమలో సముద్ర తీర ప్రాంతాలు, ఉప్పు నీటి మయం అవుతున్నాయి.! ఎందుకీ దుస్థితి.? ఇదేమీ కొత్త వ్యవహారం కాదు. కొన్ని దశాబ్దాలుగా నడుస్తోంది.
మొదట బోర్లలో ఉప్పు నీరు వచ్చేది.. ఇప్పుడు పంట పొలాల్లోకి నేరుగా చొచ్చుకు వచ్చేస్తోంది. భూమి పల్లంగా మారుతోందా.? సముద్ర నీటి మట్టం పెరుగుతోందా.?
అంతర్జాతీయంగా సముద్ర మట్టాల పెరుగుదలపై భయాందోళనలు వ్యక్తమవుతున్న సంగతి తెలిసిందే.
దీనికి తోడు, ఉభయ గోదావరి జిల్లాల్లో సముద్ర తీరంలో చమురు తవ్వకాలు కూడా, భూమి పొరల్లోకి సముద్రపు నీరు చొచ్చుకు రావడానికి కారణమన్న వాదనలు లేకపోలేదు.
సముద్రం పోటెత్తితే, ఆ సముద్రపు నీరు తీరంలోని పంట పొలాల్లోకి రావడం సర్వసాధారణమైపోయింది. తీరంలో రక్షణగా నిలిచే మడ చెట్లను విచ్చలవిడిగా నరికి పారేస్తున్నాం మరి.!
చెప్పుకుంటూ పోతే, చాలా కారణాలున్నాయి.! కోనసీమ అంటే, కొబ్బరి సీమ.. అని ప్రత్యేకంగా చెప్పాల్సిన పనిలేదు కదా.! చాలా ఏళ్ళ క్రితం సంభవించిన ఉప్పెన తర్వాత, కోనసీమలో చాలా మార్పులొచ్చాయి.
కొబ్బరి దిగుబడి తగ్గిపోయింది. కొబ్బరి నాణ్యతా తగ్గిపోయింది. ‘ఎవరి దిష్టి తగిలిందో.. కోనసీమ ఇలా అయిపోయింది..’ అని కొబ్బరి రైతులు వాపోవడం చూస్తుంటాం అక్కడ.
చేపల చెరువులు, రొయ్యల చెరువుల పేరు చెప్పి, భూములు కలుషితమైపోయాయి. కొబ్బరి చెట్లు నాశనమైపోయాయి. ఇది ఇంకో కారణం. ఈ సందర్భంలోనూ, ‘ఎవరి దిష్టి తగిలిందో’ అని కొబ్బరి రైతులు కన్నీరు మున్నీరవడం వింటూనే వుంటాం అక్కడ.
ఇలా కోనసీమ వెతల గురించి ఎంత చెప్పుకున్నా తక్కువే.! బెంగళూరు కొబ్బరి బొండాల మీద మోజు పెరిగాక, కోనసీమ కొబ్బరి బొండాలకు విలువ లేకుండా పోయింది.
ఉమ్మడి తెలుగు రాష్ట్రంలో, తెలంగాణ ఉద్యమం సమయంలో, గోదావరి జిల్లాలపైనా, కోనసీమపైనా.. తెలంగాణ నేతలు చేసిన జుగుప్సాకరమైన వ్యాఖ్యలు అన్నీ ఇన్నీ కావు.
వీటి గురించే, పరోక్షంగా ప్రస్తావించారు ఏపీ డిప్యూటీ సీఎం పవన్ కళ్యాణ్, ఇటీవల రాజోలులో ‘పల్లె పండగ’ కార్యక్రమాన్ని ప్రారంభించే క్రమంలో.
కొబ్బరి రైతులు చెప్పిన మాటల్నే, పవన్ కళ్యాణ్ ప్రస్తావిస్తూ ‘దిష్టి’ తగిలిందన్నారు. తెలంగాణ నాయకుల దిష్టి.. అనిగానీ, తెలంగాణ దిష్టి అనిగానీ.. ఎక్కడా పవన్ కళ్యాణ్ చెప్పలేదు.
కోనసీమ కొబ్బరి చెట్ల గురించి గొప్పగా తెలంగాణ నాయకులూ చెప్పేవారన్నది ఏపీ డిప్యూటీ సీఎం చెప్పిన మాట.
డిప్యూటీ సీఎం ‘దిష్టి’ గురించి మాట్లాడొచ్చా.? తెలంగాణ ప్రస్తావన తేవొచ్చా.? అంటూ, ఓ వర్గం మీడియా దిక్కుమాలిన కథనాల్ని వండి వడ్డిస్తోంది.
‘ఈ తెలంగాణ ద్వేషి అస్సలు మారడు..’ అంటూ, ఓ దిక్కుమాలిన కథనం అయితే, పవన్ కళ్యాణ్ మీద విచ్చలవిడిగా విద్వేషం వెదజిమ్మింది.
తెలంగాణలోనూ బలోపేతం అయ్యే దిశగా, పార్టీ శ్రేణులకు త్వరలో జనసేనాని దిశా నిర్దేశం చేయనున్నారన్న వార్త నేపథ్యంలో, ఒక్కసారిగా తెలంగాణలో కొన్ని అసాంఘీక శ్యక్తులు, మళ్ళీ విద్వేష రాజకీయాల్ని తెరపైకి తెచ్చాయి.
ఇటు వైసీపీ, అటు బీఆర్ఎస్.. రెండూ కలిసి, పవన్ కళ్యాణ్ మీద విద్వేష విషం చిమ్ముతున్నాయి. ఈ క్రమంలో కొన్ని మీడియా సంస్థల్ని పావులుగా వాడుతున్నాయి.
తెలంగాణ ఉద్యమంలో వైసీపీని రాళ్ళతో కొట్టిన టీఆర్ఎస్ వేరు.. ఇప్పుడు అదే వైసీపీతో చెట్టాపట్టాలేసుకు తిరుగుతున్న బీఆర్ఎస్ వేరు.
పార్టీ పేరూ మారింది.. పద్ధతీ మారింది.! వైసీపీకి బీఆర్ఎస్ అమ్ముడుపోయిందో.. బీఆర్ఎస్‌కి వైసీపీ అమ్ముడుపోయిందో.. ఏదైతేనేం, ఇలాంటి దిక్కుమాలిన విద్వేష రాజకీయాలతో మరింత దిగజారిపోతాయి ఈ రెండు పార్టీలూ.
కోనసీమ కొబ్బరి నష్టం నిజం.! ఇందులో ఇంకో మాటకు తావు లేదు. ‘దిష్టి’ అనేది రైతుల మాట.! ఇందులో ఏపీ డిప్యూటీ సీఎం పవన్ కళ్యాణ్‌ని తప్పు పట్టడానికేముంది.?
