Paranthu Po Telugu Review.. తల్లి, తండ్రి.. ఓ చిన్న పిల్లాడు.! ఈ ముగ్గురి చుట్టూ ‘పరంతు పో’ కథ తిరుగుతుంటుంది.!
తల్లి ఎక్కడో వుంటుంది.. తండ్రి, కొడుకు కలిసి మాత్రం రోడ్ ట్రిప్‌కి వెళతారు.
సినిమా కథ అంతా దాదాపుగా రోడ్ ట్రిప్‌లోనే జరుగుతుంటుంది. పిల్లాడ్ని, తండ్రి స్వేచ్ఛగా వదిలేస్తాడు. తండ్రిని, పిల్లాడు ఆటపట్టిస్తుంటాడు.
పిల్లాడు తప్పు చేసినా, తండ్రి విసుక్కుంటాడే తప్ప.. కొట్టడం లాంటివేమీ చెయ్యడు. పిల్లాడి కోసం తండ్రి చాలా కష్టపడతాడు.
మరోపక్క, తల్లి, తన భర్త అలాగే కొడుకు యోగ క్షేమాల్ని ఫోన్‌లో అడిగి తెలుసుకుంటుంటుంది.
తల్లి, తండ్రి.. ఎలాగైనా కష్టపడి, తమ పిల్లాడికి మంచి జీవితం ఇవ్వాలనే తాపత్రయపడుతుంటారు. ఇదీ ‘పరంతు పో’ కథ గురించి చెప్పాలంటే. తమిళ సినిమా ఇది.
Paranthu Po Telugu Review.. ఏ పాత్రకదే ప్రత్యేకం..
తండ్రి గోకుల్ పాత్రలో మిర్చి శివ నటించాడు. తల్లి గ్లోరీ పాత్రలో గ్రేసీ ఆంటోనీ నటించింది. పిల్లాడు అన్బు పాత్రలో మిథుల్ రియాన్ నటించాడు.
ఇది అన్బు కథ.! రోడ్ ట్రిప్‌లో బాతుల్ని పెంచే వ్యక్తితో కలిసి ఆడుకుంటాడు. ఈ క్రమంలో బాతుల్ని పెంచే వ్యక్తి, ఓ గుడ్డుని అన్బుకి ‘వేతనం’గా ఇస్తాడు. భలే క్యూటుగా వుంటుందీ సన్నివేశం.
గోకుల్ తన గర్ల్ ఫ్రెండ్‌కి పొద్దు తిరుగుడు పువ్వుని కానుకగా ఇచ్చినట్లే.. అన్బు కూడా తన గర్ల్ ఫ్రెండ్‌కి అలాంటి పొద్దు తిరుగుడు పువ్వునే ఇద్దామనుకుంటాడు. ఇది మరింత క్యూటుగా వుంటుంది.
ఏ సన్నివేశంలో అయినా, ఎమోషనల్ కంటెంట్ వైపు వెళ్ళిపోతారేమో, ఏడిపించేస్తారేమో.. గోకుల్, అన్బు ప్రమాదంలో పడిపోతారేమో అనిపిస్తుంటుది.
చిన్న చిన్న ఆర్థిక ఇబ్బందులే.. వాటినీ, ఏడిపించేసేలా ఏమీ చూపించలేదు. చిన్న అనుమానం, అంతలోనే నివృత్తి.. ఇలా సాగుతుంది కథ.!
సినిమా అంతా తండ్రి గోకుల్, కొడుకు అన్బు చేసే అల్లరితోనే గడిచిపోతుంది. గెస్ట్ అప్పీయరెన్స్ ఇచ్చిన అంజలి, తన పాత్రకు న్యాయం చేసింది.
ఫుల్ మార్క్స్ మాత్రం అన్బు పాత్రలో నటించిన చిన్న పిల్లాడు మిథుల్ రియాన్‌కే వేయాల్సి వుంటుంది. సినిమా అంతా తానే అన్నట్లు తనదైన నటనతో మెప్పించాడు.
తండ్రితో స్మోకింగ్ మాన్పించడానికి, తండ్రిని చెట్టెక్కించి.. నిచ్చెన లాగేసే సన్నివేశం కడుపుబ్బా నవ్విస్తుంది, ఆలోచింపజేస్తుంది కూడా.!
ఎక్కడమే తప్ప, దిగడం తెలియని కొడుకు.. దిగడం తెలుసుకున్నాడని తెలుసుకున్నాక, ఆ తండ్రి పడే ఆనందం.. ఇంకా క్యూటుగా వుంటుంది.
పిల్లలతో తల్లిదండ్రులు స్వేచ్ఛగా గడపండి.. ప్రకృతితో మమేకమవ్వండి.. అనే సందేశాన్నిస్తుంది సినిమా.! సినిమాలో కనిపించినవన్నీ మంచి పాత్రలే.
కథ, కథనాల్ని భలే తెలివిగా ప్లాన్ చేసుకున్నారు..
అన్ని పాత్రలూ, మెయిన్ లీడ్‌కి సహకరించుకుంటూనే వెళతాయి. కాన్‌ఫ్లిక్ట్ అనేది నెగెటివ్ యాంగిల్‌లో.. ఫలానా పాత్ర రూపంలో క్రియేట్ చేయాలనుకోకుండా, దర్శకుడు తెలివిగా కథ రాసుకున్నాడు.
ఇంటిల్లిపాదీ కలిసి కూర్చుని చూడగలిగే సినిమా ఇది.! అన్బు నవ్విస్తాడు, ఆలోచింపజేస్తాడు. అలానే గోకుల్ కూడా.! వీరిద్దరికీ గ్లోరీ మంచి సపోర్ట్ ఇచ్చింది.
ముందే చెప్పుకున్నాం కదా, అంజలి ఈ సినిమాలో సర్‌ప్రైజింగ్ ఎలిమెంట్.! సినిమాటోగ్రఫీ, ఎడిటింగ్, మ్యూజిక్.. అన్నీ సినిమాకి తగ్గట్టుగా వున్నాయి.
తెలుగులో డైలాగులు బావున్నాయి.. అంతే కాదు, పాటల్లో లిరిక్స్.. సినిమాకి తగ్గట్టుగా.. అప్పటి సన్నివేశానికి తగ్గట్టుగా.. మనసుకి హత్తుకునేలా, ఆలోచింపజేసేలా వున్నాయి.
ఓటీటీలో అందుబాటులో వుంది.. సకుటుంబ సమేతంగా కలిసి కూర్చుని ఎంచక్కా చూసెయ్యండి.! సరదాగా ప్రకృతిలో మమేకమయ్యేందుకు మీరూ ఓ రైడ్ వేసినట్లుంటుంది.
- yeSBee
