Pawan Kalyan Vs Peddireddy.. ఎర్ర చందనం అక్రమ రవాణాపై జన సేన అధినేత పవన్ కళ్యాణ్ స్పెషల్ ఫోకస్ పెట్టిన సంగతి తెలిసిందే. ఈ విషయమై వైసీపీ ఉలిక్కి పడుతోంది.
మంగళగిరిలో టిఫిన్, తిరుపతిలో లంచ్, హైదరాబాదులో డిన్నర్.. అటవీ శాఖ మంత్రి పవన్ కళ్యాణ్ ప్రత్యేక విమానంలో హైదరాబాద్ రేణిగుంట మధ్య షికార్లు చేస్తున్నారు..
ఇదీ పవన్ కళ్యాణ్, ఉమ్మడి చిత్తూరు జిల్లా పర్యటనపై వైఎస్సార్ కాంగ్రెస్ పార్టీ సోషల్ మీడియా వేదికగా వేసిన సెటైర్.!
దానికి కౌంటర్ ఎటాక్ ఇస్తూ, గాలి మోటార్ నుండి మీ అక్రమ సామ్రాజ్యం బయటకు తీస్తున్నారు, గాలి మోటార్లో షికార్లు చేయలేదు, మీ అవినీతిని షికార్ (వేటాడుతున్నారు) చేస్తున్నారు… అంటూ జనసేన స్పందించింది.
ఏపీ డిప్యూటీ సీఎం పవన్ కళ్యాణ్, చిత్తూరు జిల్లా పర్యటనలో హెలికాప్టర్ ద్వారా అటవీ భూముల్ని పరిశీలించారు, ఆక్రమణల్ని వీడియోలో చిత్రీకరించారు.
అటవీ భూముల పరిశీలన అంశాన్ని, నేరుగా క్యాబినెట్ మీటింగ్‌లో ఏపీ డిప్యూటీ సీఎం ప్రస్తావించారు, ముఖ్యమంత్రి దృష్టికి అడవి దొంగల వ్యవహారాన్ని తీసుకెళ్ళారు.
అడవి మధ్యలో, విలాసవంతమైన భవనమెలా వచ్చింది.? అసలు ఆ భవనానికి అనుమతులు ఎలా వచ్చాయి.? ఎవరు ఆక్రమించారు.? అన్నదానిపై, ఆరా తీయాలని అధికారుల్ని ఆదేశించారు ఏపీ డిప్యూటీ సీఎం.
మాజీ మంత్రి, వైసీపీ నేత పెద్దిరెడ్డి రామచంద్రా రెడ్డిని ఆక్రమణదారుగా పేర్కొంటూ, గతంలోనే అనేక ఆరోపణలున్నాయి. ఇదే విషయాన్ని జనసేనాని ప్రస్తావించారు.
మరోపక్క, ఏపీ డిప్యూటీ సీఎం పవన్ కళ్యాణ్ చేసిన ఆరోపణలపై, పెద్దిరెడ్డి రామచంద్రా రెడ్డి స్పందించారు. అది ప్రైవేటు భూమి అనీ, దురాక్రమణలకు తమ కుటుంబం పాల్పడలేదని వివరణ ఇచ్చుకున్నారు.
పెద్దిరెడ్డి రామచంద్రా రెడ్డి తనయుడు మిథున్ రెడ్డి కూడా సోషల్ మీడియా వేదికగా, పవన్ కళ్యాణ్ ఆరోపణల్ని ఖండించారు.
అయితే, పెద్దిరెడ్డి ట్వీటుపై జనసేన ఘాటుగానే స్పందించింది.
శ్రీ పెద్దిరెడ్డి మిథున్ రెడ్డి… సోషల్ మీడియాలో బుకాయిస్తే మీ తండ్రి అటవీ ఆక్రమణలు సక్రమం అయిపోవు. 16.09.1968 మంగళంపేట ఫారెస్ట్ గెజిట్ ప్రకారం 76 ఎకరాలు ఉన్న భూమి కాస్తా 103 ఎకరాల 98 సెంట్లు ఎలా అయిపోయిందో చెబుతారా మిథున్ రెడ్డి గారూ. అడవిని ఎలా కబ్జా చేశారో మీ తండ్రి రామచంద్రారెడ్డి గారిని అడగండి. 32 ఎకరాల 63 సెంట్లు అడవిని కబ్జా చేసేసినంత ఈజీ కాదు… చట్టం నుంచి తప్పించుకోవడం. ప్రజల కోసం పని చేసే నాయకుడు మా పవన్ కళ్యాణ్ గారు. మీరు ఏం చేస్తారో ఆ ప్రజలందరికీ తెలుసు. అలాంటి మీరు కూడా మా నాయకుణ్ణి విమర్శించడమా?
ఇంతకీ, అడవి దొంగలు ఎవరు.? అడవిలో దురాక్రమణలకు పాల్పడిందెవరు.? అటవీ బూముల రికార్డుల్ని తారుమారు చేసిందెవరు.?
జనసేన అధినేత, ఏపీ డిప్యూటీ సీఎం పవన్ కళ్యాణ్, రానున్న రోజుల్లో ఇంకెలాంటి సంచలనాల్ని బయటపెట్టబోతున్నారో తెలియాలంటే, వేచి చూడాల్సిందే.
