Richest Wedding In India.. కోటి కాదు.. పది కోట్లు కాదు.! యాభై కోట్లూ కాదు, వంద కోట్లూ కాదు.! ఏకంగా మూడొందల కోట్ల రూపాయల ఖర్చుతో ఓ పెళ్ళి జరిగిందిట.!
అది కూడా ఎక్కడో విదేశాల్లో కాదు. మన దేశంలోనే.! భారత సంతతికి చెందిన ఓ రిచ్చు మనిషి, తన కుమార్తె పెళ్ళిని అంగరంగ వైభవంగా భారత దేశంలోనే చేశాడు.
అమెరికా, బ్రిటన్ దేశాల్లో ఫార్మా దిగ్గజంగా పేరొందిన మన తెలుగు వ్యక్తి మంతెన రామ రాజు, తన కుమార్తె నేత్ర పెళ్ళిని ఉదయ్‌పూర్‌లో ఇటీవల అత్యంత ఘనంగా చేశారు.
తెలుగు సినీ పరిశ్రమ నుంచి మెగా పవర్ స్టార్ రామ్ చరణ్ ఈ పెళ్ళి వేడుకకు హాజరయ్యాడు. హాలీవుడ్ నుంచి ప్రముఖులొచ్చారు.
అమెరికా అధ్యక్షుడు డోనాల్డ్ ట్రంప్ తనయుడు కూడా ఈ పెళ్ళి వేడుకలో ప్రధాన ఆకర్షణగా నిలిచారు. పలువురు హాలీవుడ్, బాలీవుడ్ ప్రముఖులు.. నృత్యాలతో ఈ పెళ్ళి వేడుకకి కొత్త కళ తీసుకొచ్చారు.
లక్షల్లో పారితోషికాలు అందుకుని మరీ అందాల భామలు, ఈ పెళ్లి వేడుకలో హొయలొలికించారంటే, ఈ వివాహం ఎంత ఘనంగా జరిగిందో అర్థం చేసుకోవచ్చు.
ఓ ఇంటర్నేషనల్ సెలబ్రిటీ.. జెన్నిఫర్ లోపెజ్ ఏకంగా 17 కోట్లు సమర్పించుకున్నారట, ఈ వేదికపై పెర్ఫామ్ చేసినందుకు.
అతిథులకు రాచమర్యాదల కోసమే కోట్లాది రూపాయల సొమ్ముల్ని వెదజల్లాల్సి వచ్చింది. పెళ్ళి దుస్తులు, నగలు.. ఇవన్నీ ఏ స్థాయిలో వుండి వుంటాయో.. అది ఊహలకు కూడా అందదంతే.!
లెక్క లేనంత డబ్బు సంపాదించారు.. ఖర్చు చేశారు.! ఇందులో తప్పేముంది.? అబ్బే, అలా ఎలా కుదురుతుంది.? వందల కోట్లు ఎలా వృధా చేస్తారు.? ఇదీ జరుగుతున్న చర్చ.
ఇక్కడ ఓ విషయంలో మంతెన రామ రాజుని మెచ్చుకోవాలి. విదేశాల్లో కాకుండా, మన భారత దేశంలో పెళ్ళి వేడుకని జరపడం.
అంత ఖర్చయ్యిందంటే, ప్రత్యక్షంగానో పరోక్షంగానో ఇక్కడ చాలామందికి ఉపాధి దొరికినట్లే కదా.! ప్రభుత్వానికీ పెద్ద మొత్తంలో సొమ్ములు పన్నుల రూపంలో దక్కినట్లే కదా.?
అయినా, ఈ రోజుల్లో పెళ్ళిళ్ళు.. అంటే, మామూలుగా జరగడంలేదు.! లక్షతో పెళ్ళి అవ్వట్లేదు.. అది ఎంత చిన్నదైనా.!
వేల కోట్లకు అధిపతి అయిన మంతెన రామ రాజు, 300 కోట్లు ఖర్చు చేస్తే తప్పేముంది తమ కుమార్తె పెళ్ళి కోసం.?
నిజంగానే మూడొందల కోట్లు ఖర్చయ్యిందా.? మన మీడియా ‘అతి’ కారణంగా, ఫిగఱ్ 300 కోట్లకు చేరిందా.? కాస్త ఆలోచించాల్సిన విషయమే.!
భారత దేశంలో ఇప్పటిదాకా జరిగిన ‘ఖరీదైన’ పెళ్ళిళ్లలో ఇదే రిచ్చెస్ట్.. అని అంటున్నారు సుమండీ.! పెళ్ళి కుమార్తె నేత్ర కాగా, పెళ్ళికొడుకు పేరు వంశీ గాదిరాజు.
