Women Egg Freezing Cost.. ఎగ్స్ ఫ్రీజింగ్ అంశం జనాల్లోకి బలంగా వెళ్ళిపోయిందంటే, అందుక్కారణం ఐఐటీ హైద్రాబాద్‌లో ఉపాసన, అక్కడి విద్యార్థులకు ఇచ్చిన ఉచిత సలహానే.!
ఈ అంశంపై సోషల్ మీడియా వేదికగా పెద్దయెత్తున రాద్ధాంతం జరుగుతోంది. దానికి ఆల్రెడీ కౌంటర్ ఎటాక్ ఇస్తూ, తాను చేసిన ‘ఎగ్స్ ఫ్రీజింగ్’ వ్యాఖ్యల్ని సమర్థించుకుంది ఉపాసన.
ఉపాసన ధనవంతురాలు.. ఇందులో ఇంకో మాటకు తావు లేదు.! ఎగ్స్ ఫ్రీజింగ్, ఐవీఎఫ్.. ఈ వ్యవహారాల కోసం ఎంతైనా ఖర్చు చేయగలరామె. మరి, సామాన్యుల పరిస్థితేంటి.? అన్న ప్రశ్న తెరపైకొస్తోంది.
నిజమే కదా.! ఇంతకీ, ఎగ్స్ ఫ్రీజింగ్ కోసం ఎంత ఖర్చవుతుంది.? వాటిని ఐవీఎఫ్ కోసం ఉపయోగించడానికి ఇంకెంత ఖర్చవుతుంది.? ఈ లెక్కలపై బోల్డంత చర్చ జరుగుతోంది.
Women Egg Freezing Cost.. లక్షల్లోనే ఖర్చు.. శారీరక, మానసిక ఇబ్బందులూ..
అందుబాటులో వున్న వివరాల ప్రకారం, ఎగ్స్ ఫ్రీజింగ్ చేసుకుని, కావాలనుకున్నప్పుడు ఓ మహిళ గర్భం దాల్చాలంటే, పది లక్షల నుంచి పాతిక లక్షలు.. ఆ పైన ఖర్చవుతుంది.
కేవలం ఎగ్స్ ఫ్రీజింగ్ ప్రక్రియకే మూడు లక్షల వరకూ ఖర్చవుతాయన్నది ఓ అంచనా. పైగా, ఏడాదికి పది వేల నుంచి యాభై వేల వరకు ఖర్చు, వాటిని భద్ర పరచడానికి అద్దె రూపంలో తప్పనిసరి.
ఒకదానికంటే ఎక్కువ ఎగ్స్ (అండాలు) సేకరించడం కోసం హార్మోనల్ ఇంజెక్షన్స్ ఇస్తారు. చిన్నపాటి సర్జరీ లాంటిది కూడా చేస్తారు, అండాల్ని సేకరించడానికి.
ఈ సర్జరీ ప్రక్రియ సహా, ఎగ్స్ ఫ్రీజింగ్ ఖర్చు నాలుగైదు లక్షల దాకా వుంటుందట. కాదు కాదు, మూడు లక్షల లోపే సరిపోతుందనే వాదనా లేకపోలేదు.
అవసరమైనప్పుడు, ఐవీఎఫ్ పక్రియ ద్వారా గర్భం దాల్చడం కోసం మళ్ళీ అదనపు ఖర్చు. ఇది కూడా లక్ష రూపాయల నుంచి మూడు లక్షల వరకు వుంటుంది.
మొదటి సైకిల్‌లో వర్కవుట్ కాకపోతే, మరో ప్రయత్నం చేయాల్సి వుంటుంది. ఆపై ఇంకో ప్రయత్నం కూడా చేయాల్సి రావొచ్చు. ఇలా ఖర్చు పెరుగుతూ వెళుతుంది.
ఐవీఎఫ్ ద్వారా గర్భం దాల్చడమంటే, ఆ తర్వాత వచ్చే కాంప్లికేషన్స్, వాటి కోసం ముందస్తు జాగ్రత్త చర్యలు.. ఈ క్రమంలో మళ్ళీ అదనపు ఖర్చు.
ఒకవేళ, సరోగసీ తప్ప, వేరే అవకాశం లేకపోతే.. ఆ ఖర్చు అంచనాలకు మించి వుంటుంది. ఒక్కోసారి ఇది ఐదు నుంచి పది లక్షల పైనే వుంటుందని నిత్యం వార్తల్లో చూస్తూనే వున్నాం.
మరి, ఇంత ఖర్చుని సామాన్యులు తట్టుకోగలరా.? ఛాన్సే లేదు.! అలాంటప్పుడు, ఎగ్స్ ప్రీజ్ చేసుకోండి.. లైఫ్‌లో సెటిలయ్యాక పెళ్ళి చేసుకోండి.. అని ఎవరైనా బోడి సలహాలిస్తే, అసహ్యంగా వుంటుంది కదా.!
పెద్దలు పదే పదే చెబుతుంటారు.. ఏ వయసులో జరగాల్సిన ముచ్చట.. ఆ వయసులో జరగాలని.!
పది లక్షలో పాతిక లక్షలో.. యాభై లక్షలో కష్ట పడి సంపాదించేది, సుఖవంతమైన జీవితం కోసం. అంతేగానీ, ఎగ్స్ ఫ్రీజింగ్.. ఐవీఎఫ్.. అంటూ ఆసుపత్రులకు తగలెయ్యడానికి కాదు కదా.!
పైగా, ఈ కృత్రిమ పద్ధతుల్లో పిల్లల్ని కనే క్రమంలో, ఒళ్ళు కూడా గుల్లయిపోతుంది.. నానా రకాల హింసకూ గురవుతుందన్న విషయాన్ని మర్చిపోతే ఎలా.?
