Table of Contents
Chhinnamasta Devi Mahadevi.. సతీ దేవి వియోగం అనంతరం అమ్మవారి శరీరం తునా తునకలై ఎలా 18 శక్తి పీఠాలుగా ఆవిర్భవించిందో.. చాలామందికి తెలిసే వుంటుంది.
ఆయా శక్తి పీఠాలు ఎక్కడెక్కడున్నాయో సనాతన హిందూ ధర్మం గురించి తెలిసిన వాళ్లందరికీ తెలిసిందే.
అలాగే, కాళీ మాత, ఛండీ మాత.. ఇలా ఉగ్ర రూపంలో వుండే శక్తి స్వరూపాల గురించి కూడా సుపరిచితమే. కానీ, ‘ఛిన్నమస్త దేవి’ ఎవరీ అమ్మవారు.? ఎంతమందికి ఈ అమ్మవారి గురించి తెలుసు.?
మన హిందూ సనాతన ధర్మంలో చాలా చాలా శక్తీ స్వరూపాల ప్రస్థావన వుంది. వాటిలో కొన్ని శక్తి స్వరూపాల గురించిన చరిత్రలు చాలా ఆసక్తికరంగా అనిపిస్తాయ్.
అలాంటి ఓ ఆసక్తికరమైన చరిత్ర గలిగిన అమ్మవారే ఈ ‘ఛిన్న మస్త దేవి’. మొత్తం పది మంది తాంత్రిక దేవతల బృందాన్ని ‘మహా విద్య’ అని అంటారు.
కాళి, తార, త్రిపుర సుందరి, భువనేశ్వరి, భైరవి, ఛిన్న మస్త, ధూమవతి, భగళ ముఖి, మాతంగి, కమల తదితరుల బృందాన్ని ‘మహా విద్య’గా పరిగనిస్తారు.
Chhinnamasta Devi Mahadevi.. తన రక్తం తానే తాగే దేవత
‘ఛిన్న మస్త’ అంటే తన శిరస్సును తానే ఖండించుకుని ఆ శిరస్సును చేతిలో పట్టుకుని, మెడ నుంచి కారుతున్న రక్తాన్ని తానే స్వయంగా తాగే దేవత అని అర్ధం.
ఈ అమ్మవారు చాలా చాలా పవర్‌ఫుల్. రూపం రౌద్ర రూపం. అంత ఆషా మాషీ కాదు ఈ అమ్మవారి దర్శనం.. అని పురాణాల్లో ప్రస్థావన వుంది.
తాంత్రిక శక్తుల కోసం ఈ అమ్మవారిని ప్రత్యేకంగా పూజిస్తారనీ ప్రతీతి. అలాగే జననం, మరణం రెండింటి కోణాలనూ ఈ అమ్మవారు సూచిస్తుంది.
లైంగిక శక్తిపై స్వీయ నియంత్రణకు చిహ్నంగా ఛిన్న మస్త దేవిని సూచిస్తుంటారు. అందుకు ప్రతీకగానే రతీ మన్మధుల సంభోగంపై నిలుచుని వున్నట్లుగా అమ్మవారి రూపం ఘోచరిస్తుంది.
తన శిరస్సును తానే ఎందుకు ఖండించుకుంది.?
భయంకరమైన రాక్షస సంహారం అనంతరం రక్త దాహం తీరని అమ్మవారు తన శిరస్సును తానే నరికి మెడ నుంచి కారుతున్న ఆ రక్తాన్ని తాగుతుందట.
అదే రక్త ధారలతో తనతో పాటూ వచ్చిన ఇద్దరు పరిచారికలు డాకిని, వరుణినిల రక్త దాహం కూడా తీర్చిందట.
అందుకే, ఖండించిన శిరస్సు నుంచి వచ్చిన మూడు రక్త ధారలు ఒకటి ఖండన శిరసువైపు, మరో రెండు రక్త ధారలు ఆమెకు ఇరువైపులా వున్న డాకిని, వరుణినిల నోటి వైపు వున్నట్లుగా ఆమె రూపం కనిపిస్తుంది.
ఆరాధన, ఆవాహన.. అంత ఆషా మాషీ కాదు..
ఒక చేతిలో ఖండించిన శిరస్సు, మరో చేతిలో ఖడ్గం.. ఇరువైపులా పరిచారికలు, కాలి కింద రతీ మన్మధ సంభోగ క్రీడ.. మెడలో కపాలాలు, పాము.. నగ్న రూపాన్ని ధరించి వుంటుంది ఛిన్న మస్త దేవి. అహం యొక్క అతీంద్రియత్వాన్ని సూచిస్తుంది ఈ భంగిమ.
తీవ్రమైన ప్రయోజనాల కోసం ఇతరత్రా అన్ని పద్ధతులు విఫలమైనప్పుడు తాంత్రిక శక్తుల ఆవాహనం కోసం ప్రత్యేకంగా ఛిన్న మస్త అమ్మవారిని ఆరాధిస్తారు.
ఈ అమ్మవారి ఆవాహన అంత సులభమేమీ కాదు, చాలా కఠినమైన క్రూరమైన ఆధ్యాత్మిక అవగాహన వుండాలి.
క్రూరత్వమే కాదు, దశ మహా విద్యలకు ప్రతీకగా ఛిన్న మస్త అమ్మవారిని సూచిస్తారు. ఈ అమ్మవారి రూపం, భంగిమ చాలా చాలా విభిన్నంగా వుంటుంది.
సృష్టి – వినాశనం సర్వ నియంత్రణం.!
ఆమెను ప్రసన్నం చేసుకున్న వారికి తిరుగే లేదు. భూత, భవిష్యత్, వర్తమాన కాలాల గురించి తెలుసుకునే శక్తి దక్కుతుంది. జనన, మరణాలపై నియంత్రణ అలాగే, లైంగిక వాంఛలపై నియంత్రణ కూడా దక్కుతుంది.
అంతటి శక్తి, భయంకరమైన రౌద్ర రూపానికి ప్రతీక అయిన ఈ అమ్మవారికి ఎక్కువగా ఆలయాలు లేవు. ఉత్తర భారతంలో వారణాసి, నేపాల్, మరియు జార్ఖండ్‌లో మాత్రమే ఈ అమ్మవారి దేవాలయాలు కనిపిస్తాయ్.
అన్నట్లు బౌద్ధ మతంలోనూ ‘ఛిన్న మస్త దేవి’ అమ్మవారి ప్రస్థావన వున్నట్లు తెలుస్తోంది.
