Telusu Kada yeSBee Review.. జెన్ జీ సినిమా.! అనగా, ఇక్కడ విలువలు.. వంకాయలు.. ఏమీ వుండవ్.! మహిళా దర్శకురాలు తెరకెక్కించినా సరే.!
కానీ, సినిమాతో నీతులు చెప్పే ప్రయత్నం చేసేస్తారు.! పెళ్ళికి ముందే అన్నీ అయిపోతాయ్.. కానీ, హీరో చాలా పద్ధతిగా భార్యతో కాపురం చేసేస్తుంటాడు.!
తప్పంతా హీరో మొదటి లవర్‌దే.! కానీ, ఆమె కూడా మారిన మనిషి.! తన మాజీ లవర్ కోసం, ‘సరోగసీ మదర్’ అయిపోతుంది.!
‘తెలుసు కదా’ సినిమా కథ ఇదే.! సిద్దు జొన్నలగడ్డ, రాశి ఖన్నా, శ్రీనిధి శెట్టి, వైవా హర్ష.. ఈ సినిమాలో ప్రధాన తారాగణం.!
ఒకట్రెండు బూతులు దొర్లాయ్.. కొన్ని హాట్ సీన్స్ వున్నాయ్.! బూతుల కన్నా, హాట్ సీన్స్ కన్నా.. వాటి గురించి ప్రస్తావించిన తీరు, తెరపై చూపించిన విధానం.. అభ్యంతకరం.
సరే, ఇవన్నీ ఈ రోజుల్లో కామన్ కదా.. అని దర్శకురాలు నీరజ కోన.. అనుకుని వుండొచ్చుగాక.! నిర్మాతలు, జెన్ జీ కోసమే ఈ సినిమా తెరకెక్కించి వుండొచ్చుగాక.!
హీరో, చాలా హుందాగా ఎలాంటి సన్నివేశాన్ని అయినా డీల్ చేసేస్తాడని.. ఆ క్యారెక్టర్ ద్వారా చూపించాలనుకుంది దర్శకురాలు.! కానీ, అది చాలా చాలా ఫోర్స్‌డ్‌గా కనిపించింది.
చివర్లో హీరో క్యారెక్టరైజేషన్‌కి సంబంధించిన ఓ ట్విస్టు.! అంటే, హీరో నిజానికి మారిపోలేదు.. అతనిలో ఇంకో కొత్త కోణం వుందన్నమాట.!
ఇటు మాజీ లవర్‌తోనూ, అటు కట్టుకున్న భార్యతోనూ.. గేమ్ ఆడాడు హీరో.. అని చివర్లో చూపించింది దర్శకురాలు.! సినిమాలో చాలా సీన్స్, ఇంతకు ముందు చాలా సినిమాల్లో చూసినవే.
Telusu Kada yeSBee Review.. సైకో అనొచ్చు కదా.?
ఇందులో కొత్తగా చూపించింది ఏముంది.? నిజానికి, ఏమీ లేదు.! క్లాస్ సినిమా.. పైగా, రొమాంటిక్ టచ్ వున్న సినిమాకి.. బీభత్సమైన బ్యాక్‌గ్రౌండ్ స్కోర్ ఇచ్చాడు తమన్.
బహుశా, ‘ఓజీ’ మూడ్‌లోనే, ఈ ‘తెలుసు కదా’ సినిమాకి కూడా తమన్ బ్యాక్‌గ్రౌండ్ స్కోర్ ఇచ్చేసినట్లున్నాడు.
స్క్రీన్ మీద బొమ్మ చూడకుండా, బ్యాక్‌గ్రౌండ్ స్కోర్ చూస్తే.. అక్కడేదో బీభత్సమైన రక్తపాతం జరిగిపోతున్నట్లుగా అనిపిస్తుంటుంది.
బ్యాక్‌గ్రౌండ్ స్కోర్ ఎలాగైతే, సన్నివేశాలకు సూట్ అవలేదో.. సినిమాలో పాత్రలూ దేనికదే, కథకి సూట్ అవలేదు. కథలోని పాత్రల్లోనూ ఆయా నటీనటులు.. అస్సలు సూటవనట్లే కనిపిస్తారు.
చివరికి వైవా హర్షకి కూడా ఏం చెయ్యాలో తెలియలేదు.! ఎందుకు వున్నాడో సినిమాలో.. కానీ, సినిమాలో చాలా సేపు కనిపిస్తాడు.
నవ్వించినట్లే వుంటాడు గానీ.. అతని పాత్ర చిరాకు తెప్పిస్తుంటుంది. సినిమాలో ఏ ఎమోషన్‌తోనూ ప్రేక్షకుడు కనెక్ట్ అయ్యే పరిస్థితే వుండదు.
థియేటర్లోనే అనుకుంటే, ఓటీటీలో కూడా.. సినిమాని చూడటం కష్టమే.. అన్నట్లు సాగింది ఆద్యంతం.! శ్రీనిధి శెట్టికి ‘క్యారెక్టర్’ అనేదే లేకుండా చేసి పారెయ్యడంలో దర్శకురాలి ఉద్దేశ్యమేంటో.?
సినిమా తెరకెక్కించడమంటే, కోట్లాది రూపాయలతో కూడుకున్న వ్యవహారం.! కోట్లు తగలేసి, కథా కాకరకాయా లేకుండా.. సినిమాలు తీసెయ్యడమేంటో.. అన్న భావన కలుగుతుంది.
రిచ్‌నెస్ కోసం రేంజ్ రోవర్, కూపర్ కార్లలో నటీనటుల్ని తిప్పేసి, లగ్జరియస్ విల్లాలో వాళ్ళని చూపిస్తే సరిపోదు.. కథలో రిచ్‌నెస్ వుండాలి.. అప్పుడే, ప్రేక్షకుడు కనెక్ట్ అవుతాడు.
సిద్దు జొన్నలగడ్డ మంచి నటుడు, రాశి ఖన్నా కూడా ఫర్లేదు. శ్రీనిధి శెట్టి కూడా టాలెంటెడ్. వైవా హర్ష గురించి తెలిసిందే. ఇంత టాలెంట్ వున్నా, ఎవర్నీ సద్వినియోగం చేసుకోలేకపోవడం దర్శకురాలి వైఫల్యమే.
సినిమా ప్రమోషన్స్ మీదా, మార్కెటింగ్ మీదా పెట్టిన ఫోకస్‌లో పదో వంతు, కథ అలానే కథనాల మీదా.. పాత్రల డిజైన్ మీదా మేకర్స్ పెడితే, ఇలాంటి ఫెయిల్యూర్స్ రాకుండా వుంటాయ్.!
చివరగా: నా బిడ్డకు నిన్నే తల్లిని చేస్తా.. అని డేటింగులో వున్నప్పుడు శపథం చేసిన హీరో, ఆమె తనను వదిలి వెళ్ళాక.. పగ సాధించడమే, తెలుసు కదా.? అంతేనా.?
– yeSBee
