Poli Padyami Swargam Story.. కార్తీక మాసంలో అమావాస్య తరువాత వచ్చే పాడ్యమి తిథిని ‘పోలి పాడ్యమి’ అంటారు.
కార్తీక మాసం నెల మొత్తం ఎలాంటి దీపారాధనలు చేయలేకపోయినా.. ఈ ఒక్క రోజు ఒక్క దీపాన్ని నదిలో కానీ, నీటి సముదాయంలో కానీ వదలాలి.
అలా దీపాన్ని, నీటిలో వదిలితే, ఎంతో పుణ్యం దక్కుతుందని స్వర్గ ప్రాప్తి కలుగుతుందని పురాణాల్లో చెబుతుంటారు.
అందుకే కార్తీకం ముగిశాక వచ్చే ఈ పాడ్యమికి అంత ప్రాధాన్యత. అసలు పోలి పాడ్యమి అంటే ఏంటీ.? ఆ రోజు ఏం చేయాలి.? ఎలా చేయాలి.? ఇప్పుడు తెలుసుకుందాం.
పోలి పాడ్యమికి సంబంధించి ఓ కథ ప్రాచుర్యంలో వుంది. అనగనగా ఓ చాకలి స్త్రీ.. ఆమెకు నలుగురు కొడుకులు, కోడళ్లు.
కాగా, చిన్న కోడలంటే ఇష్టం లేని ఆ అత్త.. తన మిగిలిన ముగ్గురు కోడళ్లతోనూ కలిసి కార్తీక మాసమంతా శివాలయానికి వెళ్లి దీపాలు వెలిగించి వచ్చేది.
Poli Padyami Swargam Story.. పోలి స్వర్గం..
చిన్న కోడలిని ఇంటి చాకిరీ నిమిత్తం పని మనిషిలా చూస్తుండేది. కానీ, ఆ చిన్న కోడలికి కూడా తన అత్త, తోడి కోడళ్ల మాదిరి దీపారాధన చేయాలని అనిపించేది.
అలా కార్తీకం ముగిసి పాడ్యమి వచ్చింది. ఆ రోజు తెల్లవారుజామునే లేచి అత్త, తన ముగ్గురు తోడికోడళ్లు నదీ స్నానానికి బయలుదేరారు.
వారు వెళ్లాకా, పోలి నామధేయురాలైన చిన్న కోడలు.. పెరట్లోని బావి వద్దనే తలకు స్నానం చేసింది.
తోటలోని పత్తి చెట్టు నుంచి కొద్దిగా పత్తి తీసుకొచ్చి వత్తిగా నలిపి, మజ్జిగ కవ్వానికి అంటిన వెన్నతో శ్రద్ధగా దీపం పెట్టింది.
ఇంతలో అత్తగారు తిరిగి వస్తుండడం చూసి, ఆ దీపానికి చాకలి బానను అడ్డంగా పెట్టింది. ఆమె భక్తికి మెచ్చి స్వర్గం నుంచి దేవ దూతలు వచ్చి బొందితో ఆమెను స్వర్గానికి తీసుకెళ్లారట.
పోలి పాడ్యమి నాడు దీప దానం ఎందుకు చేయాలి.?
భక్తి శ్రద్ధలతో చేసిన దీపారాధనకు ఇలాంటి ఫలితం దక్కుతుందని చెప్పేదే ఈ పోలి స్వర్గం కథ.
పోలి పాడ్యమి రోజు ఉదయాన్నే ఈ కథను చదివి నదిలో కానీ, లేదంటే, ఇంటి వద్దనే ఓ ఇత్తడి పళ్లెంలో నీరు పోసి, దీపాలను వదిలితే, స్వర్గ ప్రాప్తి కలుగుతుందని నమ్మకం.
కార్తీక మాసం పూర్తి నెలంతా దీపారాధన చేసినంత పుణ్యం దక్కుతుందనీ పండితులు చెబుతున్నారు.
పోలి పాడ్యమి నాడు దీప దానం చేస్తే చాలా మంచిది. రెండు వత్తుల దీపం లేదా మూడు వత్తుల దీపం లేదా ఐదు వత్తుల దీపాన్ని దానం చేస్తే అష్ట ఐశ్వర్యాలూ, ఆయురారోగ్య ప్రాప్తి కలిగుతుందనీ పండితులు చెబుతున్నారు.
నెల మొత్తం ప్రతీ రోజూ ఒక్కో దీపం చొప్పున 30 దీపాల వరుసను అరటి దొప్పలో వెలిగించి సమీపంలో వున్న నదుల్లో కానీ, లేదంటే, ఇంటి వద్దనే నీటి పళ్లెంలో కానీ, వెలిగించి వదలి పెట్టాలి.
వీటినే ‘పాడ్యమి దీపాలు’ అంటారు. నెల మొత్తం దీపారాధన చేసినంతటి పుణ్యం దక్కుతుంది ఈ ఒక్కరోజు దీపారాధనతో అని పండితులు సూచిస్తున్నారు.
