Jubilee Hills Congress Win.. సిట్టింగ్ ఎమ్మెల్యే లేదా ఎంపీ ఎన్నికల్లో.. సిట్టింగ్ స్థానాన్ని గెలుచుకోవడం.. ఆయా పార్టీలకు ‘ఆనవాయితీ’గా వుండేది.
ఆ గెలుపు, ఆయా పార్టీలకు నల్లేరు మీద నడకే ఒకప్పుడు.
కానీ, లెక్కలు మారాయి. రాజకీయాలు ఒకప్పటిలా లేవు. అయినా, రాజకీయాలకు వారసత్వం ఏంటి నాన్సెన్స్ కాకపోతే.!
అంతే కదా, సిట్టింగ్ ఎమ్మెల్యే లేదా ఎంపీ చనిపోతే, ఆ నియోజకవర్గం నుంచి కొత్త ప్రజా ప్రతినిథిని ప్రజలే ఎన్నుకోవాలి. కానీ, ఈ ప్రజాస్వామ్య స్ఫూర్తికి ఏనాడో పాతరేసేశాయి రాజకీయ పార్టీలు.
‘సెంటిమెంటు’ అస్త్రాన్ని ప్రయోగించి, రాజకీయం – ప్రజాస్వామ్యం.. అనేవాటికి అర్థాల్ని రాజకీయ పార్టీలు మార్చేసి చాలాకాలమైంది.
జూబ్లీహిల్స్‌లో ఏమయ్యింది.?
జూబ్లీహిల్స్ ఉప ఎన్నికని అధికార పార్టీ అత్యంత ప్రతిష్టాత్మకంగా తీసుకుంది. గత ఎన్నికల్లో గ్రేటర్ హైద్రాబాద్ పరిధిలో తమకు ఓటర్ల తిరస్కారం ఎందుకు ఎదురైందో కాంగ్రెస్ పార్టీకి అర్థం కాలేదు.
ఈ క్రమంలో అందివచ్చిన అవకాశాన్ని కాంగ్రెస్ పార్టీ సద్వినియోగం చేసుకుంది. అభ్యర్థి ఎంపిక దగ్గర్నుంచి, సీఎం రేవంత్ రెడ్డి అన్ని విషయాల్నీ స్వయంగా పర్యవేక్షించారు.
ఎన్నికల ప్రచారంలోనూ రేవంత్ రెడ్డి అత్యంత కీలకంగా వ్యవహరించారు. ఫలితంగా కాంగ్రెస్ అభ్యర్థి నవీన్ ఘనవిజయాన్ని అందుకున్నారు.
ఒక్కో ఓటుకీ మూడు వేల ఐదు వందల రూపాయల దాకా పంచి పెట్టారన్న ఆరోపణలు మామూలే. బీఆర్ఎస్ కూడా విచ్చల విడిగా ఓట్లు కొనేసిందనే వాదన లేకపోలేదు.
కానీ, బీఆర్ఎస్ నేత మాగంటి గోపీనాథ్ మృతి, ఈ క్రమంలో ఆయన సతీమణి పోటీికి దిగినా, సిట్టింగ్ స్థానాన్ని బీఆర్ఎస్ గెలుచుకోలేకపోవడమే, గులాబీ శ్రేణులకు అస్సలు మింగుడుపడ్డంలేదు.
కేసీయార్, ఎన్నికల ప్రచారంలో పాల్గొనకపోవడం బీఆర్ఎస్‌కి పెద్ద ఎదురు దెబ్బ. అంతే కాదు, ఎన్నికల బరిలో నిలిచిన సునీత, గోపీనాథ్‌కి చట్టబద్ధమైన భార్య కాదన్న విమర్శలూ కొంత ప్రభావం చూపాయి.
కేటీయార్ మొత్తంగా జూబ్లీహిల్స్ నియోజకవర్గంలో కలియతిరిగినా, పార్టీ శ్రేణుల్ని ఉత్సాహపరచలేకపోయారు. బీఆర్ఎస్‌కి కవిత దూరమవడం కూడా, గులాబీ పార్టీకి శాపంలా మారింది.
ఒక్కటి మాత్రం నిజం, జూబ్లీహిల్స్ అసెంబ్లీ నియోజకవర్గంలో కాంగ్రెస్ పార్టీ గెలుపు, ముఖ్యమంత్రి రేవంత్ రెడ్డికి అదనపు బలాన్నిచ్చింది.
సహజంగానే, ఈ ఓటమి బీఆర్ఎస్ పార్టీకి చావు దెబ్బ. ఇందులో ఇంకో మాటకు తావు లేదు.!
ఇంకా కరెక్టుగా చెప్పాలంటే, జూబ్లీహిల్స్ ఉప ఎన్నికల్లో రేవంత్ రెడ్డి గెలిస్తే, కేసీయార్ దారుణ పరాజయాన్ని చవిచూశారు.
