ఇండియన్‌ క్రికెట్‌లోకి మళ్ళీ రావాలనుకుంటున్నాడట ఒకప్పటి ‘స్టార్‌’ యువరాజ్‌ సింగ్‌ (Yuvraj Singh Team India). ఒకప్పుడు వన్డే పోటీల్లో యువరాజ్‌ సింగ్‌ ఓ వెలుగు వెలిగాడు. కానీ, దురదృష్టవశాత్తూ అతని ప్రతిభకు దక్కాల్సిన స్థాయిలో గుర్తింపు దక్కలేదనే చెప్పాలి.
జట్టులో రాజకీయాలు, యువీని ప్రతిసారీ వెక్కిరిస్తూనే వచ్చాయి. దానికి తోడు దుందుడుకు స్వభావం యువీని మరింత ఇరకాటంలో పడేసింది. అయినా, జట్టు కోసం యువీ మైదానంలో ప్రదర్శించిన తెగువ అత్యద్భుతం. ప్రతిసారీ మ్యాచ్ విన్నర్‌.. అనిపించుకోవడానికి యువీ ప్రయత్నించేవాడు.
బ్యాటింగ్‌, ఫీల్డింగ్‌ విభాగాల్లోనే కాదు, బౌలింగ్‌లోనూ సత్తా చాటాడు. ధోనీ నేతృత్వంలో టీమిండియా వన్డే వరల్డ్‌ కప్‌ సొంతం చేసుకున్నా, టీ20 వరల్డ్‌ కప్‌ దక్కించుకున్నా.. అందులో యువీ పాత్ర చాలా చాలా ఎక్కువన్నది నిర్వివాదాంశం.
దురదృష్టవశాత్తూ వన్డే వరల్డ్‌ కప్‌ తర్వాత యువీ, క్యాన్సర్‌ బారిన పడటం.. అతని కెరీర్‌పై తీవ్ర ప్రభావమే చూపింది. క్యాన్సర్‌ని జయించినా, తిరిగి మైదానంలో సత్తా చాటలేకపోయాడు. అవకాశాలు తగ్గిపోయి, అవమానాలు ఎదుర్కొని.. చివరికి జట్టుకి దూరమయ్యాడు యువరాజ్‌ సింగ్‌.
మళ్లీ ఇన్నేళ్ళకు ఇప్పుడు తిరిగి టీమిండియా తరఫున ఆడాలనే కసితో వున్నాడట యువరాజ్‌ సింగ్‌. తిరిగి జట్టులోకి వచ్చేందుకోసం బీసీసీఐ అధ్యక్షుడు సౌరవ్‌ గంగూలీతో యువీ మంతనాలు జరుపుతున్నట్లు తెలుస్తోంది.
అయితే, 38 ఏళ్ళ యువీ మళ్ళీ మైదానంలోకి టీమిండియా జెర్సీతో అడుగుపెట్టగలడా.? పెట్టినా, మునుపటి జోష్‌ యువీ ఆటలో చూడగలమా.? ఒక్కటి మాత్రం నిజం.. యువీ అంటే ఫైటర్‌. క్యాన్సర్‌ని జయించిన యువీ.. తిరిగి జట్టులోకి వస్తే మాత్రం, సత్తా చాటి తీరతాడు.
కానీ, ఆ అవకాశం బీసీసీఐ అతనికి ఇస్తుందా.? లేదా.? అన్నదే మిలియన్‌ డాలర్ల ప్రశ్న. కాగా, యువీ, సౌరవ్‌ గంగూలీకి అత్యంత ఇష్టమైన ఆటగాడు కావడంతో.. యువీ కోరిక నెరవేరినా ఆశ్చర్యపోనక్కర్లేదు. యువీని మళ్ళీ బ్లూ జెర్సీలో చూడాలని భారత క్రికెట్‌ అభిమానులూ ఎదురుచూస్తున్నారు.
